Mayda “BakuBus” avtobuslarında unudulan əşyalar sahiblərinə qaytarılıb
Bakı, 12 iyun, AZƏRTAC
Ötən ay “BakuBus” MMC-yə məxsus avtobuslarda sərnişinlər tərəfindən unudulan 9 çanta, 3 mobil telefon, 2 pulqabı, 1 qovluq, 1 açar və 1 nəfərə məxsus əmək kitabçası may ərzində sahiblərinə təhvil verilib.
Bakı Nəqliyyat Agentliyindən AZƏRTAC-a bildirilib ki, eyni zamanda, mayda avtobuslarda tapılan 4 nəfərə məxsus şəxsiyyət vəsiqəsi və bir nəfərə məxsus iş kartı sahiblərinə çatdırılması üçün “Poçtap” xidmətinə təqdim olunub.
Həmçinin 9 açar, 6 müxtəlif kart, 4 pulqabı, 3 çanta, 2 mobil telefon, 2 qovluq, 1 sənədqabı, bloknot, pult, eynək və qayçı Bakı Şəhər Baş Polis İdarəsinə təhvil verilib.
Sahibləri məlum olmayan, içərisində əsasən geyim olan çantalar və digər əşyalar isə “BakuBus” MMC-də saxlanılır.
Vətəndaşlar şəxsiyyəti təsdiq edən sənədi təqdim etməklə özlərinə məxsus əşyaları 3 ay müddətində “BakuBus” MMC-dən təhvil ala bilərlər.
Sərnişinlər avtobuslarda unutduqları (itirdikləri) sənəd və əşyaların “BakuBus” MMC-yə daxil olub-olmaması barədə “www.alo141.az” saytından məlumat əldə edə bilərlər. “BakuBus” MMC-yə məxsus avtobuslarda tapılan sənədlərlə əşyaların şəkilləri və müvafiq məlumatlar saytda “İtirilən və tapılan əşyalar” bölməsində yerləşdirilir.
“BakuBus” MMC avtobuslarda sərnişinlər tərəfindən unudulan (itirilən) sənəd və əşyalara görə məsuliyyət daşımır.
Bölmənin digər xəbərləri
