MDB-nin üzvü olan ölkələrin dövlət başçılarının qeyri-rəsmi zirvə görüşü
Xəbər verdiyimiz kimi, avqustun 2-də Rusiya Federasiyasının Prezidenti Vladimir Putin, Azərbaycan Respublikasının Prezidenti Heydər Əliyev, Qazaxıstan Respublikasının Prezidenti Nursultan Nazarbayev, Qırğızıstan Respublikasının Prezidenti Əsgər Akayev, Ermənistan Respublikasının Prezidenti Robert Koçaryan, Moldova Respublikasının Prezidenti Vladimir Voronin, Özbəkistan Respublikasının Prezidenti İslam Kərimov, Tacikistan Respublikasının Prezidenti Emoməli Rəhmonov, Ukrayna Prezidenti Leonid Kuçma xüsusi avtobusla Daqomis iqamətgahından 10 kilometr aralıda, çay plantasiyalarının yaxınlığında yerləşən “Çay evi” kompleksinə gəldilər.
Prezidentlər burada birgə xatirə şəkli çəkdirdilər. Sonra Müstəqil Dövlətlər Birliyinin üzvü olan ölkələrin dövlət başçılarının qapalı qeyri-rəsmi görüşü başlandı.
Görüşü Rusiya Federasiyasının Prezidenti Vladimir Putin açaraq üzv ölkələrin dövlət başçılarını bir daha salamladı, qeyri-rəsmi görüşdə iştirak etmək üçün Soçiyə gəldiklərinə görə onlara təşəkkürünü bildirdi.
Dövlət başçıları MDB-nin qeyri-rəsmi zirvə görüşündə çıxış edərək Müstəqil Dövlətlər Birliyinin inkişaf perspektivləri, MDB-nin yaranmasının 10 illik yubileyinin keçirilməsinə hazırlıq tədbirləri, bir sıra üzv ölkələrin yaratdıqları regional təşkilatların - GUÖAM, Avrasiya İttifaqı və digər qurumların işi, MDB-nin üzvü olan ölkələr arasında iqtisadi əməkdaşlığın daha da möhkəmləndirilməsi, azad ticarət zonası, zirvə görüşlərində qəbul edilən qərarların yerinə yetirilməsi, MDB-nin üzvü olan ölkələr arasında qarşılıqlı maraq doğuran əməkdaşlığın genişləndirilməsi, MDB məkanında təhlükəsizlik, strateji sabitlik, beynəlxalq terrorizmə, etnik separatizmə, narkotik vasitələrin dövriyyəsinə qarşı birgə mübarizə və bir sıra digər məsələlər ətrafında geniş müzakirələr apardılar.
Qeyd olundu ki, bütün bunlar birliyə daxil olan ölkələrin hamısını maraqlandıran və narahat edən məsələlərdir. Prezidentlər MDB məkanında daxili və xarici təhlükəsizliyin, strateji sabitliyin, sülh və əmin-amanlığın yaradılması üçün üzv ölkələrin səylərinin birləşdirilməsinin vacib olduğunu nəzərə çarpdırdılar.
MDB-nin fəaliyyəti ilə bağlı belə bir fikir səsləndi ki, Müstəqil Dövlətlər Birliyi SSRİ-nin dağılmasından sonra postsovet məkanında yaradılmış zəruri strukturdur və Birlik ötən dövr ərzində öz rolunu oynamışdır. Eyni zamanda vurğulandı ki, MDB çərçivəsində müxtəlif regional təşkilatlar var və bundan sonra da ola bilər. Onlar heç də Birliyi dağıtmır, əksinə, konkret məsələlərin səmərəli həllinə kömək edə bilər. Bu qurumlar açıq xarakter daşıyır və Birliyin digər üzvləri də bunlara qoşula bilərlər.
Dövlət başçıları belə bir yekdil fikir də söylədilər ki, Soçidə keçirilən qeyri-rəsmi zirvə görüşü çox faydalıdır və MDB-nin gələcək praktiki fəaliyyətinə öz müsbət təsirini göstərəcəkdir.
Soçi görüşünün əhəmiyyətini yüksək qiymətləndirən cənab Putin “böyük səkkiz”lərin bu yaxınlarda İtaliyanın Genuya şəhərində keçirilmiş görüşü, habelə Amerika Birləşmiş Ştatlarının Prezidenti cənab Corc Buş ilə Sloveniyadakı görüşü haqqında, o cümlədən raketdən müdafiə sistemi və strateji hücum silahlarının azaldılması barədə müqavilələrlə əlaqədar aparılan danışıqlara dair ətraflı məlumat verdi.
Görüş başa çatdıqdan sonra prezidentlər birgə mətbuat konfransı keçirdilər və jurnalistlərin suallarına cavab verdilər.
Bölmənin digər xəbərləri
