MƏCBURİ KÖÇKÜNLƏRİN MƏŞĞULLUĞUNUN TƏMİN EDİLMƏSİ DİQQƏT MƏRKƏZİNDƏDİR
Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov AZƏRTAC-ın müxbirinə demişdir ki, doğma yurdlarından didərgin düşmüş soydaşlarımıza müxtəlif rayonlarda müvəqqəti istifadə üçün dövlət və bələdiyyə ehtiyat fondundan təxminən 50 min hektar torpaq sahəsi ayrılmış, 45 min məcburi köçkünü əhatə edən 760 fermer təsərrüfatı yaradılmışdır. Komitənin nəzdində 9 sənaye kombinatı, 14 aqrar sənaye və fermer təsərrüfatı fəaliyyət göstərir. Təkcə ötən il 42 min 726 nəfər qaçqın və məcburi köçkün daimi və mövsümi işlə təmin olunmuşdur. Bərdə, Füzuli və Ağcabədi rayonlarında 14 kiçik istehsal sahəsi yaradılmış, Sahibkarlığa Kömək Milli Fondu tərəfindən 189 məcburi köçkünə 3 milyard manat məbləğində güzəştli kredit verilmiş, nəticədə 1000-dən çox adam üçün iş yeri açılmışdır.
Əmək və Əhalinin Sosial Müdafiəsi Nazirliyi və onun bölmələri ilə qarşılıqlı fəaliyyət şəraitində qaçqınların və məcburi köçkünlərin məşğulluğunun təmin edilməsi, peşə hazırlığı kurslarına, haqqı ödənilən müvəqqəti işlərə cəlb olunması sahəsində işlər davam etdirilir.
Bölmənin digər xəbərləri
