MƏDƏNİYYƏT NAZİRLİYİ MƏTBUAT XİDMƏTİNİN MƏLUMATI
Bu günlərdə ölkəmiz daha bir nüfuzlu beynəlxalq təşkilata - “Mədəni dəyərlərin qorunması və bərpası üzrə beynəlxalq araşdırmalar mərkəzi”nə (İCCROM) üzv qəbul edilmişdir. YUNESKO-nun təsisçiliyi ilə 1959-cu ildən fəaliyyət göstərən İCCROM abidələrin, təsviri sənət əsərlərinin, tarixi və arxeoloji yerlərin qorunması və bərpası ilə məşğul olur. Bu sahədə elmi, texniki məsələlərə dair informasiyanı toplayır, öyrənir və yayır, mütəxəssislərin beynəlxalq görüşlərini təşkil edir. Mərkəzi qərargahı Romada yerləşən təşkilata indiyədək 102 dövlət üzv qəbul olunmuşdur.
Tarixi irsimizin dünya miqyasında tanınması, başqa dövlətlərlə bu sahədə sıx əlaqələr qurulması və onların iş təcrübəsini öyrənməyin əhəmiyyətini nəzərə alaraq, 2001-ci ildə Azərbaycanın Mədəniyyət Nazirliyi və YUNESKO üzrə Azərbaycan Milli Komissiyası ölkəmizin bu mötəbər quruma üzv qəbul olunması barədə müraciət etmişdi. Bu günlərdə YUNESKO Katibliyindən alınmış sənəddə bildirilir ki, respublikamız 2002-ci il fevralın 3-dən İCCROM-un üzvüdür.
Mədəni sərvətlərimizin qorunması, onların beynəlxalq səviyyədə etibarlı mühafizəsinin təşkili, bu sahə ilə məşğul olan yerli mütəxəssislərin hazırlanması və s. məsələlərin həlli baxımından bu quruma üzvlük respublikamız üçün çox əhəmiyyətlidir və əlamətdar hadisə kimi qiymətləndirilməlidir.
Müstəqil Dövlətlər Birliyinin üzvü olan ölkələrdən indiyədək İCCROM-a Qazaxıstan və Gürcüstan üzv qəbul edilmişdir.
Bölmənin digər xəbərləri
