MƏDƏNİYYƏT
“MƏNİM VƏTƏNİM - AZƏRBAYCAN” KİTABININ TƏQDİMATI
M.F.Axundov adına Azərbaycan Dövlət Kitabxanasında məşhur həmyerlimiz, görkəmli dövlət xadimi, keçmiş SSRİ Nazirlər Soveti sədrinin müavini, Sosialist Əməyi Qəhrəmanı, Rusiya-Azərbaycan Dostluq Cəmiyyətinin sədri Nikolay Baybakovun “Mənim vətənim - Azərbaycan” kitabının təqdimat mərasimi keçirilmişdir.
Mərasimi kitabxananın direktoru Leyla Qafurova açdı.
“Azərbaycanın övladları” ədəbi seriyasının baş redaktoru, Zərdabi mükafatı laureatı, professor Viktor Tatarenkonun “Nikolay Baybakov Azərbaycan xalqının tanınmış oğludur” mövzusunda məruzəsi dinlənildi. Sonra moskvalı qonaq P.Şenşin, filologiya elmləri doktoru, professor H.Quliyev, Suraxanı rayonu rus icmasının sədri V.Koçetkova, dövlət kitabxanasının direktoru L.Qafurova, Mədəniyyət Nazirliyinin şöbə rəisi, şair Çingiz Əlioğlu, Azərbaycan-Rusiya Dostluq Cəmiyyətinin məsul katibi O.Vəliyev və başqaları çıxış etdilər.
Natiqlər bildirdilər ki, görkəmli həmyerlimizin oxuculara təqdim olunan kitabı Azərbaycan ilə Rusiya arasında dostluq və əməkdaşlıq əlaqələrinin inkişafına, respublikamızın xaricdə daha yaxşı tanıdılması işinə xidmət edir. Azərbaycanın sosial-iqtisadi inkişafından, o cümlədən neft sənayesinin keçdiyi yoldan bəhs edən kitabda Böyük Vətən müharibəsi illərində alman faşizmi üzərində qələbənin qazanılmasında Bakı neftçilərinin əvəzsiz xidmətləri xüsusi vurğulanır.
Müəllif dövrümüzün görkəmli siyasi və dövlət xadimi, Azərbaycan Prezidenti Heydər Əliyevin şəxsiyyətindən böyük səmimiyyətlə söhbət açır.
Mərasim iştirakçıları tərəfindən böyük maraqla qarşılanan “Mənim vətənim - Azərbaycan” kitabının nüsxələri kitabxanaya hədiyyə edildi.