SİYASƏT
Mərakeş Azərbaycan ilə əlaqələrin inkişaf etdirilməsində maraqlıdır
Bakı, 30 oktyabr (AZƏRTAC). Oktyabrın 30-da Milli Məclisin beynəlxalq münasibətlər və parlamentlərarası əlaqələr komitəsinin üzvləri III Bakı Beynəlxalq Humanitar Forumunda iştirak etmək üçün ölkəmizdə səfərdə olan Mərakeş parlamentinin deputatı, Aqdal Rayon Şurasının sədri Məhəmməd Rza bin Xaldun ilə görüşmüşlər.
AZƏRTAC xəbər verir ki, komitənin üzvü Sevinc Fətəliyeva qonağa Azərbaycan haqqında məlumat vermişdir. Bildirilmişdir ki, Azərbaycan qısa müddətdə sürətlə inkişaf edərək regionun lider dövlətinə çevrilmişdir.
Dağlıq Qarabağ münaqişəsindən danışan Milli Məclisin deputatı Ermənistanın hərbi təcavüzü nəticəsində Azərbaycan torpaqlarının 20 faizinin işğal edildiyini diqqətə çatdırmışdır. Qeyd olunmuşdur ki, Ermənistan beynəlxalq təşkilatların, o cümlədən BMT Təhlükəsizlik Şurasının münaqişənin həlli ilə bağlı qəbul etdiyi qətnamələrə məhəl qoymur.
Azərbaycan ilə Mərakeş arasında dostluğun və əməkdaşlığın inkişaf etdiyini deyən S.Fətəliyeva qarşılıqlı səfərlərin bu əlaqələrin inkişafına xüsusi töhfə verəcəyindən əminliyini bildirmişdir.
Məhəmməd Rza bin Xaldun III Bakı Beynəlxalq Humanitar Forumunda iştirak etməsindən məmnunluğunu bildirmişdir. O, Mərakeşin dost və qardaş Azərbaycan ilə siyasi, iqtisadi, turizm, mədəniyyət sahələrində əlaqələrin inkişaf etdirilməsində maraqlı olduğunu diqqətə çatdırmışdır.
Görüşdə hər iki ölkənin parlamentlərində fəaliyyət göstərən dostluq qruplarının qarşılıqlı münasibətlərin inkişafında rolu müzakirə olunmuşdur.