“Mercedes-Benz” Çində iş yerlərini ixtisar edəcək
Bakı, 27 fevral, AZƏRTAC
“Mercedes-Benz” şirkəti özünün ən böyük bazarında əmək xərclərini dörddəbir azaltmaq məqsədinə çatmaq üçün 2027-ci ilə qədər Çində iş yerlərini ixtisar edəcək.
AZƏRTAC xəbər verir ki, Almaniyanın dəbdəbəli avtomobil istehsalçısı ötən həftə Çində qiymət rəqabətinin güclənməsi və qlobal ticarət gərginliyinin artması fonunda 2025-ci ildə mənfəətin əhəmiyyətli dərəcədə aşağı olacağı barədə xəbərdarlıq edərək, bütün dünya üzrə əlavə xərclərin azaldılması anonsunu verib.
“Reuters” agentliyi xəbər verir ki, “Mercedes-Benz” çərşənbə axşamı Çindəki satış və maliyyə törəmə şirkətlərində çalışanlara bu iş yerlərinin təxminən 10-15 faizini ixtisar edəcəyini bildirib. Şirkət bu ilin sonunda İT və hüquq kimi digər funksional bölmələrdə də analoji ixtisarlar etməyi planlaşdırır.
Şirkətin Çində təxminən 5 min işçisi var.
Ancaq “Mercedes-Benz” öz məhsullarını daha rəqabətədavamlı etmək üçün yerli təchizatçılarla fəal tərəfdaşlıq etməyi planlaşdırır və Çinə sərmayələri ikiqat artırır.
Şirkət, bir çox digər böyük xarici avtomobil istehsalçıları kimi, Çində böyük rəqabətli elektrik və hibrid avtomobil seqmentində BYD kimi yerli rəqiblərə məğlub olduğu üçün son illərdə satış itkiləri ilə üzləşir.
Bölmənin digər xəbərləri
