Mərkəzi Bank Qubada maliyyə savadlılığı təlimləri keçirib
Bakı, 19 dekabr, AZƏRTAC
Mərkəzi Bank "Azərbaycan Respublikasında maliyyə xidmətlərinin inkişafına dair Strateji Yol Xəritəsi"nin "Maliyyə bazarı iştirakçılarının bilik və bacarıqlarının artırılması" adlı hədəfinin icrası ilə əlaqədar Quba şəhərində bir qrup tələbə-gənclər və təqaüdçülər üçün növbəti tədbirlər keçirib.
Bankdan AZƏRTAC-a bildiriblər ki, Mərkəzi Bankın Quba Regional Mərkəzində təşkil etdiyi təlimlərdə "Üçüncü Bahar" sosial layihə iştirakçıları olan təqaüdçülərdən və Quba Dövlət Sosial-İqtisadi Kollecinin tələbələrindən ibarət iştirakçılara pulun təhlükəsizlik elementləri, bank əməliyyatları, pulköçürmələri və kredit və zaminlik mövzularında təlimlər keçirilib, Maliyyə savadlılığı portalı (bizimpullar.az) və Virtual Təhsil platforması (edu.e-cbar.az) haqqında məlumatlar verilib. Mövzular ətrafında müvafiq animasiyalar nümayiş etdirilib, müzakirələr aparılıb və iştirakçıları maraqlandıran suallar cavablandırılıb.
Qeyd edək ki, "Üçüncü Bahar" sosial layihə iştirakçıları olan təqaüdçülər cari ildə pilot hədəf qrupu kimi maliyyə savadlılığı tədbirlərinə cəlb olunublar. Onların bu istiqamətdəki maraq və həvəsini nəzərə alaraq növbəti illərdə də təqaüdçülərlə maliyyə maarifləndirilməsi işlərinin aparılması planlaşdırılır.
Mərkəzi Bank sözügedən Strateji Yol Xəritəsinin icrası ilə əlaqədar cari təşəbbüslərini genişləndirərək, hədəf qruplarına yönəlmiş müxtəlif tədbirləri gələcəkdə də davam etdirəcək.
Bölmənin digər xəbərləri
