Mərkəzi Seçki Komissiyası: Moldovada parlament seçkiləri baş tutmuş hesab olunur
Kişineu, 28 sentyabr, AZƏRTAC
Moldovada parlament seçkiləri baş tutmuş hesab olunur. Səsvermədə 1 milyondan çox vətəndaş iştirak edib ki, bu da seçici siyahılarında qeydiyyata alınmış ümumi seçicilərin üçdəbirinə bərabərdir.
AZƏRTAC xəbər verir ki, Mərkəzi Seçki Komissiyasının (MSK) məlumatına əsasən, Seçicilərin Dövlət Reyestrində 3 299 396 səsvermə hüququ olan vətəndaş qeydiyyatdan keçib. Saat 14:30-a olan məlumata görə, iştirak göstəricisi seçicilərin ümumi sayının üçdəbirini təşkil edib. Parlament seçkilərinin baş tutmuş hesab olunması üçün minimum 33,3 faiz seçicinin iştirak etməsi tələb olunur.
Seçkilərin nəticəsinə əsasən, Moldova Respublikasının XII çağırış parlamentinin 101 deputatı seçiləcək. Səsvermə prosesi saat 07:00-da başlayıb və 21:00-da (Bakı vaxtı ilə 22.00) başa çatıb.
Vətəndaşlar ölkə daxilində və xaricdə açılmış 2 274 seçki məntəqəsində səs verə bilərlər. Ümumilikdə seçki məntəqələrində seçki sistemi üzrə 24 mindən çox əməkdaş fəaliyyət göstərir.
Parlament seçkiləri üçün MSK 2 772 255-dən artıq bülleten çap edib. Onların 2 117 039-u rumın dilində, 649 573-ü rus dilində, 3 400-ü qaqauz, 1 827-si bolqar, 416-sı isə roman dilindədir.
Seçkiləri 3 423 müşahidəçi izləyir. Onların 2 496-sı milli müşahidəçidir və ölkənin səkkiz ictimai assosiasiyasını təmsil edir. Əksər müşahidəçilər Promo-LEX Assosiasiyasının və Moldova Hüquqşünaslar İttifaqının müraciəti əsasında akkreditə olunub. Eyni zamanda, MSK 912 beynəlxalq müşahidəçini akkreditə edib.
Seçki yarışında ümumilikdə 32 müraciətdən 23-ü qeydiyyata alınıb: 15 siyasi partiya, dörd seçki bloku və dörd müstəqil namizəd.
Moldova Respublikasının Konstitusiyasına görə, parlament ümumi, bərabər və birbaşa seçki hüququ əsasında gizli və azad səsvermə yolu ilə dörd il müddətinə seçilir. Parlament seçkiləri proporsional sistem üzrə, vahid ümummilli dairə üzrə və bir turda keçirilir. 101 mandatın bölgüsündə yalnız seçki baryerini aşan namizədlər iştirak edə bilər. Bu baryer siyasi partiyalar üçün 5 faiz, bloklar üçün 7 faiz, müstəqil namizədlər üçün isə 2 faiz müəyyən edilib.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
