Məzahir Əfəndiyev: Azərbaycanda sosial sahəyə istiqamətlənən dövlət vəsaitlərində ciddi artım müşahidə edilir
Bakı, 16 iyul, AZƏRTAC
Ötən il Azərbaycanda sosial sahədə inqilabi islahatlar ilinə çevrilib. Prezident İlham Əliyevin təqdim etdiyi iki sosial paket ölkədə minimum əməkhaqqının iki dəfəyə yaxın, minimum pensiyanın 72,4 faiz, sosial müavinət və təqaüdlərin isə orta hesabla 100 faiz artırılmasına imkan yaratdı.
Bu fikirləri AZƏRTAC-a açıqlamasında Milli Məclisin deputatı Məzahir Əfəndiyev söyləyib.
Deputat qeyd edib ki, COVID-19 virusunun qlobal səviyyədə yayılması nəticəsində bir sıra ölkələrdə 2020-ci ilin əvvəlindən iqtisadi baxımdan yavaşımanın, büdcədə kəsirin və bunlarla bağlı olaraq sosial sahə üçün ayrılan vəsaitlərin ixtisar edilməsi hallarının baş verməsinə baxmayaraq, Azərbaycanda bu ilin birinci yarısında sosial sahəyə - əhalinin sosial təminatına, ümumən sosial rifahın yüksəlməsinə istiqamətlənən dövlət vəsaitlərində ciddi artım müşahidə edilməkdədir.
Belə ki, bu ilin əvvəlindən dövlət büdcəsindən ayda əlavə olaraq 43 milyon manat vəsait sərf edilməklə 1 milyon 200 min pensiyaçını əhatə edərək pensiyaların indeksləşdirilərək 16,6 faiz artırılması təmin olunub. Ümumilikdə bu il pensiyaların maliyyələşməsinə 2019-cu ilin müvafiq dövrünə nisbətən 436,51 milyon manat çox olmaqla, 2 milyard 250 milyon manat vəsait xərclənib.
M.Əfəndiyev bildirib ki, əlavə olaraq cari ilin birinci yarımilində 412,1 nəfərə aylıq, qalanlarına isə birdəfəlik olmaqla 455,4 min nəfərə sosial müavinət ödənilib. Keçdiyimiz ilin müvafiq dövrü ilə müqayisədə 46,6 faiz çox olmaqla, 2020-ci ilin yanvar-iyun aylarında əhaliyə bütövlükdə 475 milyon manat sosial müavinət və təqaüd ödənilib.
"Prezident İlham Əliyevin tapşırığına əsasən ünvanlı dövlət sosial yardımı proqramı çərçivəsində son aylarda yardım alan ailələrin sayı 14 mindən çox artıb. Hazırda 350 mindən çox ailə üzvü olmaqla 85 minə yaxın ailəyə dövlət tərəfindən yardım edilməkdədir. Yardım alan ailələrin sayının və yardım məbləğinin artmasını nəzərə alsaq, dövlət büdcəsindən bu istiqamət üzrə yönəldilən vəsaitlər də artmaqdadır. Belə ki, ünvanlı dövlət sosial yardımın orta aylıq məbləği 225 manatı keçib. Bu statistika əsasında deyə bilərik ki, 2019-cu ilin ilk 6 ayına nisbətən bu il ünvanlı dövlət sosial yardımlarının ödənişində də artım olub, 62 faiz çox olmaqla, təxminən 105 milyon manat məbləğində yardım edilib. Pandemiyanın çətinliklərini nəzərə alaraq xüsusi karantin rejimi dövründə ünvanlı dövlət sosial yardımının təyin olunma müddəti bitən ailələrə yardım üçün ödənişlərin verilməsi də davam etdirilməkdədir", - deyə o qeyd edib.
Həmçinin bu çətin günlərdə dövlətin vətəndaşının yanında olduğunu bir daha sübut etdiyini deyən deputat bildirib: "Xüsusi karantin rejimi dövründə COVID-19 pandemiyasından zərər çəkmiş, gəlirini itirən, qeyri-formal işləyən 600 min şəxsə sosial dəstək tədbirlərindən biri kimi, aprel-may aylarında aylıq 190 manat birdəfəlik ödəniş olunub, proqramın icrası üçün isə 229 milyon manat yönəldilib.
Beləliklə, 2020-ci ilin 6 ayının yekununda Əmək və Əhalinin Sosial Müdafiəsi Nazirliyi tərəfindən 3 milyon vətəndaşımıza ümumilikdə 3 milyard 59 milyon manat vəsait pensiya, müavinət, təqaüd, ünvanlı sosial yardım və birdəfəlik ödəmə formasında edilib. Bu göstərici ötən ilin birinci yarımilinə nisbətən 860 milyon manat, yəni, 40 faiz daha çoxdur".
"Bütün bunlar bir daha göstərir ki, həyat davam edir, pandemiya dövründə belə hökumət daim vətəndaşın yanındadır, onun sosial rifahının qorunması və dövlətin davamlılığını təmin etmək üçün əlindən gələni əsirgəmir", - deyə M.Əfəndiyev əlavə edib.
Bölmənin digər xəbərləri
