Milli Aviasiya Akademiyasında “Azərbaycanda nəqliyyatın aktual problemləri” XXIV Elmi-texniki tələbə konfrans keçirilib
Bakı, 4 may, AZƏRTAC
Mayın 4-də “Azərbaycan Hava Yolları” QSC-nin Milli Aviasiya Akademiyasında Heydər Əliyevin anadan olmasının 100-cü ildönümünə həsr edilmiş “Azərbaycanda nəqliyyatın aktual problemləri” XXIV Elmi-texniki tələbə konfransı keçirilib.
AZƏRTAC xəbər verir ki, əvvəlcə konfrans iştirakçıları Ümummilli Lider Heydər Əliyevin Akademiyanın həyətindəki büstünün önünə əklil qoyub, əziz xatirəsini ehtiramla yad ediblər.
Azərbaycan Respublikasının Elm və Təhsil Nazirliyi və “Azərbaycan Hava Yolları” QSC tərəfindən təşkil olunan tədbirə MAA-nın tələbələri ilə yanaşı, respublikanın digər ali təhsil müəssisələrinin, o cümlədən Bakı Dövlət Universiteti, Azərbaycan Texniki Universiteti, Azərbaycan Dövlət Neft və Sənaye Universiteti, Mingəçevir Dövlət Universitetinin tələbələri də qatılıblar.
Konfransı açan Akademiyanın birinci prorektoru, professor Ədalət Səmədov Milli Aviasiya Akademiyasının rektoru, akademik Arif Paşayevin konfrans iştirakçılarına salamlarını çatdırıb və gənc tədqiqatçılara uğurlar arzulayıb.
Qeyd olunub ki, Azərbaycan Prezidenti İlham Əliyevin Sərəncamı ilə 2023-cü il “Heydər Əliyev İli” elan edilib. Akademiyada bununla əlaqədar tədbirlər planı hazırlanaraq təsdiq olunub. Tədbirlər planına uyğun olaraq, Akademiyada respublika və beynəlxalq səviyyəli konfransların keçirilməsi, “Heydər Əliyev və Azərbaycan mülki aviasiyası” kataloqunun, “Səma-Sky” jurnalının xüsusi nömrəsinin hazırlanması və dərc edilməsi, xeyriyyə aksiyalarının, ağacəkmə kampaniyalarının keçirilməsi, Heydər Əliyev zirvəsinə yürüşün təşkili, tələbələr arasında müxtəlif intellektual yarışların, olimpiadaların və spartakiadaların keçirilməsi nəzərdə tutulub.
Prorektor diqqətə çatdırıb ki, müasir müstəqil Azərbaycan dövlətinin qurucusu, xalqımızın Ümummilli Lideri Heydər Əliyev hələ Sovet İttifaqı dövründə milli kadrların yetişdirilməsini və onların Azərbaycanın inkişafına töhfə verməsini düşünürdü. Məhz Ulu Öndərin təşəbbüsü ilə 1970-1988-ci illərdə təxminən on beş min Azərbaycan gənci təhsil almaq üçün SSRİ-nin aparıcı ali məktəblərinə göndərilmişdi. Heydər Əliyev həmin gənclərin nadir peşə sahiblərinə çevrilməsini və respublikamızın bu sahələrinin gələcəkdə inkişaf etməsini istəyirdi. Təsadüfi deyil ki, bu gün həmin dövrdə xaricdə təhsil almış 50-yə yaxın mütəxəssis Akademiyada çalışır.
Vurğulanıb ki, Ulu Öndər mülki aviasiya sahəsinə də xüsusi diqqətlə yanaşaraq, bu sahədə yüksək səviyyəli kadrların yetişməsi istiqamətində səmərəli addımlar atmışdı. Müstəqillik dövründə Ümummilli Lider yeni hava limanlarının tikintisinə, təyyarə parkının və hava məkanının idarəetmə sistemlərinin yenilənməsinə, aviasiya sahəsində təhsil sisteminin formalaşmasına nail olmuşdu.
Plenar iclasda Akademiyanın İqtisadiyyat və hüquq fakültəsinin tələbəsi İsmayıl Qəmbərli “Heydər Əliyev çağdaş Azərbaycan dövlətinin banisidir”, Nəqliyyat texnologiyaları fakültəsinin tələbəsi Aytac Mustafayeva “Heydər Əliyevin Azərbaycan nəqliyyatının inkişafında rolu” mövzularında məruzələrlə çıxış ediblər.
Daha sonra “Ümummilli Lideri Bakıya gətirən pilotun 27 illik sirri” filmi nümayiş olunub.
Film ətrafında çıxışlarda AZAL-ın vitse-prezidenti, MAA-nın Hava gəmilərinin uçuş istismarı kafedrasının müdiri, Əməkdar pilot İlham Əmirov, “Tu 154” laynerinin kapitanı Firudin Əliyev və Xalq şairi Nəriman Həsənzadə Ulu Öndər Heydər Əliyevlə bağlı xatirələrini bölüşüblər.
İşini bölmələrdə davam etdirən konfransın proqramında 8 bölmə üzrə 170-ə yaxın məruzə dinlənilib.
Bölmənin digər xəbərləri
