MİLLİ ƏNƏNƏLƏRİMİZİ QORUMAQ HAMININ BORCUDUR
Mayın 22-də Qadın Problemləri üzrə Dövlət Komitəsində “Azərbaycanın milli ənənələri və qarşıda duran vəzifələr” mövzusunda elmi-praktik konfrans keçirilmişdir.
Respublika Ağsaqqallar Şurası ilə birgə keçirilən konfransı Şuranın sədri, akademik Budaq Budaqov açaraq müzakirə olunan mövzunun aktuallığını vurğuladı. O, milli adət və ənənələrimizin qorunub saxlanılmasında dövlətimizin başçısı Heydər Əliyevin müstəsna rolundan, eləcə də bu sahədə ağbirçəklərin və ağsaqqalların qarşısında duran vəzifələrdən, onlarin gənclər təşkilatları və məktəblərlə birgə, əlaqəli fəaliyyətinin vacibliyindən danışdı.
Qadın Problemləri üzrə Dövlət Komitəsinin sədri Zəhra Quliyeva “Azərbaycanin milli ənənələri və qarşıda duran vəzifələr” mövzusunda geniş məruzə etdi. Ölkəmizin rəhbərinin “Hər xalqın özünə, öz tarixi köklərinə, əcdadları tərəfindən yaradılmış milli mənəvi dəyərlərinə bağlılığı böyük amildir” sözlərini xatırladan məruzəçi Komitənin bu sahədəki fəaliyyətindən söhbət açdı. Eyni zamanda, o, təəssüflə bildirdi ki, indiki keçid dövründə milli mənəvi dəyərlərimizə, adət və ənənələrimizə biganəlik halları ilə də tez-tez rastlaşırıq. Müxtəlif adlar altında fəaliyyət göstərən təşkilatların zərərli təbliğatla məşğul olması halları da var. Ona görə də belə hallara qarşı mübarizə aparmaq, milli mənəvi dəyərlərimizi qorumaq təkcə ayrı-ayrı dövlət təşkilatları və qurumlarının deyil, hər bir vətəndaşın, azərbaycanlının borcudur.
Konfrans iştirakçıları Azərbaycan Prezidenti Heydər Əliyevə müraciət qəbul etdilər.
Bölmənin digər xəbərləri
