AZƏRTAC xəbər verir ki, parlamentin fevralın 27-də keçirilmiş iclasında Azərbaycan Respublikası Milli Məclisinin parlamentlərarası əlaqələr üzrə işçi qruplarının tərkibində dəyişikliklər edilmişdir. Sonra “Azərbaycan Respublikası Prezidentinin “Bağ təsərrüfatı haqqında” Azərbaycan Respublikasının Qanununa etirazları barədə” məsələ müzakirə olunmuşdur. Aqrar siyasət daimi komissiyasının sədri Eldar İbrahimov demişdir ki, dövlət başçısının parlamentə göndərdiyi sənəddə, keçmiş sovet dövlətindən miras qalmış bağ təsərrüfatının mövcud bazar münasibətləri ilə ziddiyyət təşkil etdiyi qeyd olunur. Bildirilmişdir ki, 2006-cı il dekabrın 22-də parlamentdə qəbul edilmiş “Bağ təsərrüfatı haqqında” Qanun həmin sahədə islahatlar aparılmasına xidmət etmir və Azərbaycan Respublikasının Konstitusiyası, Torpaq Məcəlləsi, Mülki Məcəlləsi və digər qanunlarla ziddiyyət təşkil edir.

Sənəddə tövsiyə olunur ki, digər sahələr kimi, bağçılıq sahəsində də islahatların aparılması zəruriliyi nəzərə alınaraq, vətəndaşların qanuni mənafelərinin müdafiəsi üçün onların istifadəsində olan bağ sahələrinin özəlləşdirilməsi təmin edilməlidir.

Fikir mübadiləsi zamanı deputatlar 5 fəsil, 26 maddədən ibarət Qanunun deyilən təkliflər, tövsiyələr nəzərə alınmaq şərtilə yenidən hazırlanmasının vacibliyini vurğulamışlar. Bağ təsərrüfatı subyektləri arasında münasibətləri tənzimləyəcək yeni layihədə bazar iqtisadiyyatı, sahibkarlıq fəaliyyəti, dövlət və bələdiyyə fondunda olan torpaqlardan istifadə qaydaları, özəlləşdirmə haqqında qanunların müddəalarının nəzərə alınması zəruriliyi qeyd olunmuş və Qanun yenidən işlənmək üçün müvafiq komissiyaya qaytarılmışdır.

İclasda “Azərbaycan Respublikasının bəzi qanunvericilik aktlarına dəyişikliklər və əlavələr edilməsi barədə” qanun layihəsinə də baxılmışdır. “Əcnəbilərin və vətəndaşlığı olmayan şəxslərin hüquqi vəziyyəti haqqında” (təhsil hüququ ilə bağlı), “Toxumçuluq haqqında” (fitosanitar nəzarəti ilə əlaqədar), Cinayət Məcəlləsinə (vəzifə saxtakarlığı) və İnzibati Xətalar Məcəlləsinə (fitosanitar nəzarəti haqqında qanunvericiliyin pozulması) təklif olunan dəyişikliklərə və əlavələrə münasibət bildirilmiş və layihə səs şoxluğu ilə qəbul edilmişdir.

Sonra “Bələdiyyələrin fəaliyyətinə inzibati nəzarəti həyata keçirən orqanın illik məruzəsi” dinlənilmişdir. Ədliyyə nazirinin müavini Vilayət Zahirov çıxış edərək demişdir ki, ötən il ölkədə yerli demokratiyanın inkişafına yönələn müxtəlif tədbirlər həyata keçirilmiş, yerli özünüidarə orqanlarının daha yaxşı təşkilatlanması üçün qanunvericilik aktları qəbul edilmişdir. 2006-cı ildə bələdiyyələrin fəaliyyətinə inzibati nəzarətin həyata keçirilməsi istiqamətində də xeyli işlər görülmüşdür. Həmin dövrdə Ədliyyə Nazirliyinə inzibati nəzarət qaydasında baxılması üçün 16703 bələdiyyə aktı təqdim olunmuşdur ki, bu da 2005-ci ildəkindən 65 faiz çoxdur. 988 aktın ləğv edilməsi və ya dəyişdirilməsi üçün bələdiyyələrə təkliflər verilmiş, 466 bələdiyyə qərarı ləğv edilmiş, 22-si dəyişdirilmişdir. 146 bələdiyyə sədri barəsində inzibati xəta haqqında protokollar tərtib olunaraq məhkəmələrə göndərilmiş, 18 bələdiyyə sədri inzibati məsuliyyətə cəlb olunmuş, 17 bələdiyyə barəsində Respublika prokurorluğu tərəfindən cinayət işi başlanmışdır. İl ərzində 1559 hektar torpaq sahəsinin qanunsuz satışı və icarəyə verilməsinin qarşısı alınmışdır.

Yerli özünüidarə orqanlarına metodoloji yardım göstərilməsi məqsədi ilə 2006-cı il ərzində bələdiyyə üzvləri və bələdiyyə qulluqçuları üçün kurslar təşkil olunmuş, seminarlar keçirilmiş, metodik vəsaitlər hazırlanmışdır. Hesabat dövründə 1633 vətəndaş qəbul edilərək, onların müraciətlərinə baxılmış, qanunvericiliklə bağlı izahatlar verilmişdir. Ötən il bələdiyyələrin daha yaxşı təşkilatlanması ilə də əlamətdar olmuşdur. Avropa Yerli və Regional Hakimiyyətlər Konqresi və Norveç Yerli və Regional Hakimiyyətlər Assosiasiyası ilə sıx əməkdaşlıq çərçivəsində bələdiyyələrin milli assosiasiyalarının təşkili işi nəzərdə tutulduğundan xeyli əvvəl başa çatdırılmış, şəhər, qəsəbə və kənd bələdiyyələrinin 3 milli və 3 regional assosiasiyası yaradılmışdır. Bələdiyyələrin fəaliyyətinin və onlara inzibati nəzarətin təkmilləşdirilməsi sahəsində xarici ölkələrin dövlət və yerli özünüidarə orqanları, habelə beynəlxalq təşkilatlarla məqsədyönlü əməkdaşlıq əlaqələri qurulmuşdur. Türkiyə, Latviya və Norveçin yerli özünüidarə orqanları, Avropa Şurası, Almaniya Texniki Əməkdaşlıq Cəmiyyəti, Seçki Sistemləri üzrə Beynəlxalq Fond və Azərbaycanda fəaliyyət göstərən digər beynəlxalq təşkilatlarla təcrübə mübadiləsi aparılmış, digər tədbirlər həyata keçirilmişdir.

Sonra müzakirələr aparılmış, deputatlar məruzəni qənatbəxş hesab etmişlər.

                                                                     Axşam iclasında Xocalı soyqırımının 15 illiyi ilə əlaqədar Azərbaycan Respublikası Milli Məclisinin sənədləri qəbul olunmuşdur. Parlament sədrinin müavini Bahar Muradova çıxış edərək demişdir ki, Xocalı soyqırımı ilə bağlı fevralın 26-da keçirilmiş müzakirələrdən sonra Milli Məclisin bəyanatına və qərar layihəsinə müvafiq komissiyada yenidən baxılmış, deputatların bəzi rəy və təklifləri nəzərə alınmaqla, sənədlər əsaslı surətdə təkmilləşdirilmişdir. Sonra hər iki sənəd yekdilliklə təsdiqlənmişdir (Bəyanat və qərar qəzetin bugünkü nömrəsində dərc olunur).

Sonra “Atçılıq haqqında” qanun layihəsi ikinci oxunuşda müzakirəyə çıxarılmışdır. Milli Məclisin aqrar siyasət daimi komissiyasının sədri Eldar İbrahimov bildirmişdir ki, birinci oxunuşdan sonra işçi qrupu layihəyə 9 maddə əlavə etmişdir. İndi 6 fəsil, 36 maddədən ibarət olan bu sənəd ölkəmizdə atçılığın təşkilinin və idarə edilməsinin iqtisadi və hüquqi əsaslarını müəyyənləşdirəcək, atçılıq subyektləri arasında münasibətləri tənzimləyəcəkdir. Layihə əsas kimi qəbul edildikdən sonra müzakirələr başlandı.

Deputatlar atçılıq təsərrüfatının inkişafı və dövlət uçotunun aparılması, atçılığın obyektləri və subyektləri, bu sahədə dövlət siyasətinin istiqamətləri, damazlıq atların Dövlət reyestrinin aparılması, cins atlar üçün şəhadətnamələrin tərtib edilməsi, cıdır meydanları, atçılıq idmanı klublarının fəaliyyəti və s. ilə bağlı maddələrə münasibətlərini bildirmiş, rəy və təkliflərini söyləmişlər. Qanun layihəsi fəsil-fəsil müzakirə olunduqdan sonra bütövlükdə səsə qoyularaq, ikinci və üçüncü oxunuşlarda qəbul edilmişdir.