MİLLİ MƏCLİSDƏ QƏBUL
Sentyabrin 27-də Milli Məclis sədrinin müavini Ziyafət Əsgərov Litva Respublikasının ədliyyə naziri Vitautas Markyaviçusu qəbul etmişdir.
Parlament sədrinin müavini qonağı salamlayaraq dedi ki, Litva Ədliyyə Nazirliyinin nümayəndə heyətinin Azərbaycana səfəri ölkələrimiz arasında münasibətlərin daha da inkişaf etməsi istiqamətində yeni bir addımdır. Son illər bu münasibətlər yüksələn xətt üzrə inkişaf edir. Bu il Azərbaycanın bir sıra nazirliklərinin rəhbərləri Litvada səfərdə olmuş, ölkəmizin parlament nümayəndə heyəti NATO-nun Parlament Assambleyasının Vilnüsdə keçirilmiş iclasında iştirak etmişdir. Ziyafət Əsgərov Milli Məclisin işi, qəbul edilən qanunlar və sənədlər barədə də məlumat verdi.
Cənab Markyaviçus səmimi qəbula görə təşəkkür edərək dedi ki, nümayəndə heyəti Bakıda olduğu müddətdə Azərbaycan Ədliyyə Nazirliyi ilə əməkdaşlığın genişləndirilməsi sahəsində müəyyən iş görmüşdür. O, bildirdi ki, Litva parlamenti ölkələrimizin ədliyyə nazirləri tərəfindən əvvəllər imzalanmış və əməkdaşlığımızın hüquqi əsasını qoymuş sənədi ratifikasiya etmişdir.
Bölmənin digər xəbərləri
