Dünya şöhrətli ümummilli lider, zəmanəmizin görkəmli şəxsiyyəti və dövlət xadimi Heydər Əliyevin ideya-siyasi, nəzəri-praktiki irsinin sistem kimi öyrənilməsi bu gün elmimizin şərəf borcu, həqiqətə xidmət etmək missiyasıdır.

Ulu öndərimizin əbədiyyətə qovuşduqdan sonra, onun Azərbaycan tarixi fonunda görünən əzəməti və zəkasına, Azərbaycan adlı məmləkətin varlığını arzudan real gerçəkliyə çevirmək sahəsində fəaliyyəti və xidmətinə həsr olunmuş əsərlər işıq üzü görməkdədir. Bu da təbiidir. Çünki bu gün alimlər, tədqiqatçılar Böyük Öndər qarşısında vəfa, sədaqət borcunu yerinə yetirməyə çalışırlar. Bu gün bu kitablar yazılır. Bu kitablar sabah da yazılacaq və qəti əminəm ki, sabah yazılacaq kitablar bu gün yazılan əsərlərdən daha obyektiv olacaqdır. Çünki bu xidmətlərin əsl məzmunu, əsl mahiyyəti zaman keçdikcə daha da açılacaqdır.

Biz bu gün çox dəyərli bir kitabın təqdimat mərasimində iştirak edirik. Yüksək ehtiramın, böyük məhəbbətin təzahürü olan bu kitab dünyanın ən böyük sirri, möcüzəsi olan tarixi şəxsiyyətlərdən birinin - Böyük Öndərimiz cənab Heydər Əliyevin çoxşaxəli fəaliyyətinin yalnız müəyyən tərəflərini işıqlandırmaq məqsədi ilə yazılmış əsərdir. Fəlsəfə elmləri doktoru, professor Ramiz Mehdiyevin “Əsl vətəndaş, böyük şəxsiyyət və qüdrətli lider haqqında bəzi düşüncələr”i 30 ildən artıq müddət ərzində böyük bir dühanı hər gün görmək, onunla ünsiyyətdə olmaq, böyük Öndərin sevincli və kədərli anlarını müşahidə etmək, yüksək idarəçilik və təşkilatçılıq məharətindən bəhrələnmək xoşbəxtliyini yaşamış bir insanın təəssüratlarıdır, fikirləridir.

Əsərin qiyməti də məhz bundadır. Oxuduqca, müəllifə qibtə hissi keçirirsən. Çünki bu, adi xatirələr çələngi deyildir. Bu, müasir Azərbaycanda dövlət quruculuğunun, iqtisadi dirçəlişin və sosial tərəqqinin məhz belə bir tarixi şəxsiyyətin əməli fəaliyyətinin nəticəsi olmasının təsdiqidir. Bu, həm də elmi təhlildir, yüksək məsuliyyət hissi ilə deyilmiş həqiqətdir.

Əsərdə Heydər Əliyev fenomeni yaşadığımız “dünya” adlı nəhəng miqyasda, qlobal və ümumbəşəri konteksdə, Şərq və Qərb məkanının tarix boyu yetişdirdiyi ən görkəmli, bənzəri olmayan şəxsiyyət mövqeyindən dəyərləndirilmişdir.

Ali səmimiyyət nümayiş etdirən müəllif etiraf edir ki, “Heydər Əliyevin siyasi portretini tam dolğunluğu ilə yaratmaq mümkün deyil, çünki bu, bütöv bir dövrü təsvir etməyə cəhd göstərmək demək olardı”.

Bu, həqiqətdir, bununla razılaşırıq. Çünki yalnız böyük ictimai proseslərin təhlili, elmi analizi zamanı tarixi şəxsiyyətin rolu obyektiv qiymətləndirilə bilər. Fəqət, böyük ictimai proseslərin nisbi başlanğıc və nisbi sonluq nöqtələrini dərk edə bilmədiyimizdən, bu interval daxilində proseslərin axarına qatılaraq, onu bir tam kimi qavramaq, imkanımızın məhdudluğundan prosesləri istiqamətləndirən qüvvənin mahiyyətinə varmaq bəzən həddindən artıq çətin olur.

Dünyaya öz dünyasının gözü ilə baxmaq, hadisələrə və insanlara öz ölçüləri baxımından qiymət vermək, təhlil imkanlarından sona qədər istifadə etməmək fərdə xas keyfiyyətlərdir. Bəlkə də, bir insan ömrünün qısalığı buna imkan vermir.

Mürəkkəb ictimai–siyasi, sosial münasibətlərə müdaxilənin çətinliyini dərk edən, içərisində olduğu toplumdan ayrılmağın, axına qarşı üzməyin ağrısına dözə bilməyəcəyini anlayan insan Tarixi Şəxsiyyət qarşısında heyranlıq və heyrət hissi yaşayır. Çünki özündə ola bilməyən o cəsarəti, qüdrəti məhz həmin şəxsiyyətdə görür.

Böyük Zəkanın qeyri-məhdud imkanları isə mühiti öz ölçülərinə uyğunlaşdırmağa yönəlir. Hər bir fərdin davranış və düşüncəsini idarə etməyə qadir olan bu enerji insanların taleyinin ayrılmaz hissəsinə çevrilir. Bu isə öz növbəsində, milli qürur, milli heysiyyət hissini formalaşdırır. Gələcəyə ümid, inam hissi yaradır. Cəmiyyətdə, mühitdə yeni, daha mütərəqqisini, gözəlini yaratmaq istəyir və həmin mühitdə yaşayan insanların davranışına, düşüncə tərzinə təsir edərək, onları da yeniləşdirir, ətrafa, dünyaya münasibətində daha gözəl cəhətlər yaratmağa sövq edir.

Bir insanda zaman və məkanca əlçatmaz uzaqlarda olan görkəmli şəxslərin təcrübəsi ümumiləşirsə, bu təcrübə yeni şəraitdə yeni proqnozlar verməyə və ali məqsədlərin reallaşmasına yardım etməyə qadirdirsə, bu cəmlənmiş enerji Əbədi Ruhun ölməzliyinin təsdiqidir.

Bu enerjinin yaşı yoxdur. Onun yaşı xalqımın, millətimin yaşı qədərdir. Bu enerji müxtəlif zamanlarda reallaşır, konkret tarixi şəxsiyyətlərin fəaliyyətində gerçəkləşərək, milli varlığı təmin edir, şərəfli missiyasını yerinə yetirib “Yaşa, millətim!” - deyib əbədiyyətə qovuşur. Əsərdə bu ruhun daşıyıcısı - Böyük Öndərimiz haqlı olaraq, Tanrı payı adlandırılmışdır.

Tarixin əsas hərəkətverici qüvvəsi çağırışdır. Tarixi şəxsiyyətin ən böyük qətiyyəti zamanın çağırışına cavab vermək əzmi, qabiliyyətidir. “Müstəqilliyimiz əbədidir, dönməzdir, sarsılmazdır” ifadəsi zamanın çağırışına verilən cavabdır. Dövlətin, millətin tarixi inkişafında müəyyən müdaxilələr nəticəsində kəsilən, fasilələr yaranan zaman tarix yaddaşlarda ən böyük məqsədlərin dəyərini azaldır, millətin öz qüvvəsini yenidən cəm etmək imkanı kiçilir. Məhz buna görə Böyük Öndərimiz müstəqilliyimizin əbədi olmasını, müstəqil Azərbaycanın bir də heç vaxt tarix ağrısı yaşamaması üçün bu məqsədi həyatının mənası hesab edirdi.

Heydər Əliyev Azərbaycan adlı məmləkətdə tarix boyu dövlətçilik, idarəetmə və siyasi liderlik ənənəsinin və təcrübəsinin çox dərin köklərə malik olduğunu dünyaya nümayiş etdirdi. Böyük Öndər çox gözəl bilirdi ki, yalnız keçmiş yaddaşla yaşayan insanlar zaman duyğusunu itirir. Keçmiş irsə arxalanaraq, gələcəkdə özünü təsdiq imkanını genişləndirmək əsas vəzifədir.

Azərbaycan türk dünyasının bəşər tarixində yalnız fatehlik, böyük hərb və qılınc himayəsi və gücünə deyil, həm də siyasi mədəniyyət, diplomatiya və dövlətçilik kimi köklərə əsaslandığını aşkara çıxartdı. Bu gün dünyaya yüksək diplomatik məharət nümayiş etdirən Böyük Öndərimizin şəxsi nümunəsi buna sübutdur. Bu ənənə davam edir. Hörmətli Prezidentimiz cənab İlham Əliyevin fəaliyyəti bu fasiləsizliyi təmin edəcəkdir.

Müstəqil dövlətin dönməzliyini, sarsılmazlığını daxilən azad, milli təfəkkürlü, milli ruhun qorunub saxlanmasında maraqlı olan vətəndaş təmin edə bilər. Fərdin vətəndaşa çevrilməsi mürəkkəb prosesdir. Əsl vətəndaş mövqeyini milyonlara nümunəyə, örnəyə çevirən Böyük Öndərimiz azərbaycanlı obrazını dünyaya təqdim etdi. Mənəvi dirçəliş sahəsində atılan hər bir addım azərbaycanlı obrazının cilalanmasına xidmət edir. Şəxsiyyət fenomeninə çox qısqanclıqla yanaşan dünya bu gün bunu qəbul edir.

Dünyanın ixtiyar sahiblərini, siyasi elitasını təşkil edən dövlət xadimlərinin kitabda toplanan ürək sözləri, səmimi heyrəti, təəccüb və ehtiramı Böyük Öndərimizə verilən qiymətdir, böyük etirafdır.

Azərbaycan millətini və xalqını öz-özünə və bütün dünyaya tanıtdıran insanın – Heydər Əliyevin Yeni Azərbaycan Partiyasının 10 illiyinə həsr olunmuş yubiley mərasimində söylədikləri yaxşı yadımızdadır: “Azərbaycanı sayırlar, bizə hörmət edirlər, bizimlə hesablaşırlar”. Bəlkə bu sözü demək, bütün ömrünü həsr etdiyi məqsədlərin son nəticəsi idi. Doğrudan da çox məğrurluqla deyilən bu söz hamımızda məsuliyyət hissi yaradır. Biz də buna çalışmalıyıq. Onun yaratdığı obraza, azacıq da olsa, xələl gəlməməsi üçün hər birimiz çiynimizi bu böyük məsuliyyətin altına verməliyik.

“Dünyanı heyran qoyan insan” kitabını oxuduqca, siyasətdə uzunömürlülüyə, zəka və mənəviyyatda əbədiyaşarlığa nadir nümunə olan ümummilli liderimiz Heydər Əliyevin bu heyranlığı doğuran keyfiyyətlərinin intəhasızlığına əmin olursan. Yadıma Həzrət Əlinin köhnəlməyən sözləri düşür: “Haqq o qədər parlaqdır ki, onu hamı görür. Onu görməmək mümkün deyil”.

Diqqətinizə görə sağ olun!