MİLLİ MƏCLİSİN NÜMAYƏNDƏ HEYƏTİ ROMADA QADIN DEPUTATLARIN ÜMUMDÜNYA KONFRANSINDA İŞTİRAK ETMİŞDİR
Konfransda Azərbaycanı Milli Məclisin sədr müavini Gövhər Baxşəliyeva və Azərbaycan-İtaliya parlamentlərarası işçi qrupunun rəhbəri, deputat Amalya Pənahova təmsil etmişlər. Qadın deputatlar müxtəlif ölkələrdə uşaqların vəziyyətinə, onların hüquqlarının qorunmasına, uşaq əməyinin istismarının qarşısının alınmasına və sair mövzulara dair fikir mübadiləsi aparmış və görüləcək işlərin müştərək planını hazırlamışlar.
Uşaq hüquqlarına aid sessiyada ailə, təhsil və idman məsələlərinin müzakirəsi ilə bağlı debatlarda çıxış etmək üçün söz deputat Amalya Pənahovaya verilmişdir. Bu zaman Ermənistan nümayəndəsi riyakarlıq edərək düyməsini basıb və onun əvəzinə danışmağa başlamışdır. Səfirliyimizin əməkdaşları və nümayəndələrimiz tərəfindən görülən operativ tədbirlər nəticəsində erməni deputatın çıxışı dərhal dayandırılmış və söz Azərbaycan deputatına verilmişdir.
Deputat Amalya Pənahova uşaq və yeniyetmələr probleminin Azərbaycan üçün də aktuallığı barədə danışmışdır. Natiq bildirmişdir ki, Ermənistanın Azərbaycana hərbi təcavüzü nəticəsində ərazilərimizin 20 faizi işğal olunmuş, 1 milyondan artıq vətəndaşımız, o cümlədən də uşaqlar öz ölkəsində məcburi qaçqın və köçkünə çevrilmişlər. Erməni silahlı birləşmələri təkcə böyükləri deyil, həm də uşaqları qəddarlıqla öldürmüş, onlara işgəncələr verərək ömürlük şikəst etmişlər. Dağlıq Qarabağ münaqişəsinin nizama salınmaması Azərbaycanda uşaqlar və yeniyetmələr üçün ciddi problemlər doğurur. Problemin sülh yolu ilə nizama salınması işində dünya ictimaiyyətinin fəallığından çox şey asılıdır.
“Uşaqlar hərbi münaqişələrdə” mövzusunda debatlarda ingilis dilində çıxış edən Milli Məclisin sədr müavini Gövhər Baxşəliyeva azərbaycanlıları öz tarixi torpaqlarından silah gücünə çıxararaq etnik təmizləmə aparan Ermənistanın Azərbaycana təcavüz etdiyini, qanlı Xocalı soyqırımını törətdiyini diqqətə çatdırmış, ölkəmizə dəymiş maddi və mənəvi ziyan barədə konkret faktlar əsasında ətraflı məlumat vermişdir. Dağlıq Qarabağdan və ona bitişik rayonlardan, eləcə də Ermənistandan silah gücünə qovulmuş azərbaycanlıların böyük əksəriyyətini uşaqlar və yeniyetmələrin təşkil etdiyini söyləyən natiq demişdir ki, işğal nəticəsində minlərlə məktəb və məktəbəqədər tərbiyə müəssisəsi dağıdılmışdır. Həmin məktəblərin şagirdləri on ildən çoxdur ki, dözülməz şəraitdə çadırlarda yaşayır və təhsil alırlar. Çox təəssüf ki, hüquqları pozulmuş bu uşaqların taleyinə beynəlxalq təşkilatların böyük əksəriyyəti biganədir. Bu məsələyə biganə qalmaq olmaz. Azərbaycanlı uşaqların pozulmuş hüquqlarının bərpa olunmasında beynəlxalq öhdəliklər mütləq yerinə yetirilməlidir.
Azərbaycan deputatlarının çıxışları konfrans iştirakçılarında dərin maraq doğurmuşdur.
Bölmənin digər xəbərləri
