MƏDƏNİYYƏT
Milli Muğam Müsabiqəsinin birinci turunun xanəndəlik kateqoriyası üzrə seçimlərinə start verilib
![](/files/galleryphoto/2023/1/1200x630/16823421255077919209_1200x630.jpg)
![](/files/galleryphoto/2023/1/1200x630/16823421252242523_1200x630.jpg)
![](/files/galleryphoto/2023/1/1200x630/16823421251294941191_1200x630.jpg)
![](/files/galleryphoto/2023/1/1200x630/1682342125900062913_1200x630.jpg)
![](/files/galleryphoto/2023/1/1200x630/1682342125892256376_1200x630.jpg)
![](/files/galleryphoto/2023/1/1200x630/16823421251208942691_1200x630.jpg)
![](/files/galleryphoto/2023/1/1200x630/16823421254350124015_1200x630.jpg)
![](/files/galleryphoto/2023/1/1200x630/16823421251214028044_1200x630.jpg)
![](/files/galleryphoto/2023/1/1200x630/16823421255320021812_1200x630.jpg)
![](/files/galleryphoto/2023/1/1200x630/16823421251970943384_1200x630.jpg)
![](/files/galleryphoto/2023/1/1200x630/1682342125496424188_1200x630.jpg)
![](/files/galleryphoto/2023/1/1200x630/16823421254960337222_1200x630.jpg)
![](/files/galleryphoto/2023/1/1200x630/1682342125148889562_1200x630.jpg)
![](/files/galleryphoto/2023/1/1200x630/16823421255912031792_1200x630.jpg)
![](/files/galleryphoto/2023/1/1200x630/1682342126510321348_1200x630.jpg)
![](/files/galleryphoto/2023/1/1200x630/1682342126286753488_1200x630.jpg)
Bakı, 25 aprel, Emil Məlikov, AZƏRTAC
Aprelin 24-də Azərbaycan Milli Konservatoriyasında Heydər Əliyev Fondunun təşəbbüsü ilə növbəti Milli Muğam Müsabiqəsinin birinci turunun seçimlərinə başlanılıb.
AZƏRTAC xəbər verir ki, müsabiqə Heydər Əliyev Fondu və Mədəniyyət Nazirliyinin təşkilatçılığı, Elm və Təhsil Nazirliyinin, Azərbaycan Milli Konservatoriyasının dəstəyi ilə keçirilir.
Əvvəlcə Azərbaycan Milli Konservatoriyasının rektoru, Xalq artisti, müsabiqənin münsiflər heyətinin sədri Siyavuş Kərimi çıxış edərək bildirib ki, Milli Muğam Müsabiqəsi Ümummilli Lider Heydər Əliyevin 100 illiyi münasibətilə təşkil olunub.
Rektorun sözlərinə görə, Milli Muğam Müsabiqəsi xanəndə və instrumental ifaçılıq kateqoriyaları üzrə keçirilir. Musiqi yarışmasına yaşı 18-dən 35-dək olan xanəndə və instrumental ifaçılar müraciət edib. Müraciət etmiş şəxslərin ilkin seçim turlarından sonra müsabiqəyə 38 nəfər vəsiqə qazanıb. 38 iştirakçıdan 20-si xanəndəlik, 18-i isə instrumental ifaçılıq üzrə yarışacaq. Müsabiqənin 1-ci turu aprelin 24-25-də, ikinci turu isə aprelin 26-da keçiriləcək. Aprelin 30-da isə müsabiqənin yekun konserti olacaq. Aprelin 26-da xanəndə və instrumental ifa kateqoriyaları üzrə qaliblər seçiləcək. Xanəndə və instrumental kateqoriyalarında 1, 2 və 3-cü yerin hər bir qalibi müvafiq olaraq 7 000, 5 000 və 3 000 AZN mükafat qazanacaq.
Milli Muğam Müsabiqəsində instrumental ifaçılıq kateqoriyası üzrə dinləmələrdən sonra günün ikinci yarısında xanəndəlik kateqoriyası üzrə dinləmələrə başlanılıb.
Səhnəyə dəvət olunan müsabiqə iştirakçıları - Məftun Səfərli, Vüsal Qasımov, Vüqar Əbilov, Ülkər Abdullayeva, Xəyal Hüseynov, Daşqın Kürçaylı, Mənzurə Əbdürrəhmanova, Vəliş Mirzəyev, Rühəngiz Musayeva və Laləzar Ağayevanın ifaları dinlənilib.
Gənc muğam ifaçılarını münsiflər heyətinin sədri, Milli Konservatoriyanın rektoru, Xalq artisti Siyavuş Kərimi, Xalq artistləri Səkinə İsmayılova, Mənsum İbrahimov, Zabit Nəbizadə, Əməkdar artist Qəzənfər Abbasov qiymətləndiriblər.
Qeyd edilib ki, Milli Muğam Müsabiqəsinin qalibləri-xanəndə və instrumental ifa üzrə birinci yeri tutan iştirakçılar ölkəmizi “Muğam aləmi” 6-cı Beynəlxalq Muğam Festivalında təmsil edəcəklər.