MİLLİ OLİMPİYA KOMİTƏSİNDƏ “GƏNCLƏR MÜKAFATI”NIN TƏQDİMOLUNMA MƏRASİMİ KEÇİRİLMİŞDİR
Mərasim iştirakçıları ümummilli liderimiz, Prezident Heydər Əliyevin, şəhidlərin xatirəsini bir dəqiqəlik sükutla yad etdilər.
Mərasimdə çıxış edən gənclər, idman və turizm naziri Əbülfəz Qarayev əsası Azərbaycan Xalq Cümhuriyyəti dövründə qoyulmuş gənclər hərəkatının yaranma tarixindən danışdı, Azərbaycan gənclərinin bütün sahələrdə qazandıqları böyük uğurların ümummilli liderimiz Heydər Əliyevin adı ilə bağlı olduğunu vurğuladı. Bildirdi ki, Heydər Əliyev ölkəmizə rəhbərlik etdiyi bütün dövrlərdə gənc nəslin problemlərinə, təhsil və mədəni səviyyəsinin yüksəlməsinə daim böyük diqqət yetirmişdir. Onun Fərmanı ilə fevralın 2-si Gənclər günü elan olunmuşdur. İndi gənclərin əsas vəzifəsi xalqımızın dahi oğlunun müstəqilliyimizin möhkəmləndirilməsinə və ölkəmizin gələcək tərəqqisinə yönəlmiş siyasətini davam etdirməkdən ibarətdir.
Sonra Gənclər, İdman və Turizm Nazirliyinin, yaradıcılıq birliklərinin, turizm şirkətlərinin və idman federasiyalarının nümayəndələrindən ibarət münsiflər heyətinin müəyyən etdiyi laureatların adları elan olundu.
“Gənc aktyor” nominasiyasında Elşən Rüstəmov, “Gənc aktrisa” nominasiyasında Nərgiz Kərimova, “gənc rejissor” nominasiyasında Elvin Mirzəyev, “Ən yaxşı debüt” nominasiyasında Əsmər Qurbanova qalib hesab edilmişlər. Memarlıq sahəsində ən yaxşı tikinti işinə görə Teyyub Teyyubov, ən yaxşı layihəyə görə Orxan Ələsgərov, memarlığa dair ən yaxşı nəşrə görə Təranə Məmmədova, bu sahədə ən yaxşı məqaləyə görə Sevinc Tanqudur mükafat almışlar. Kəmalə Həsənova ən yaxşı simfonik əsər, Kəmalə Əlizadə ən yaxşı kamera musiqisi əsəri, Vüqar Camalzadə ən yaxşı instrumental kamera musiqisi, Səadət Şirinova musiqişünaslıq sahəsində ən yaxşı tədqiqat əsəri üçün mükafata layiq görülmüşlər. Kino sahəsində İqbal Məmmədəliyev və Orman Çingizoğlu sənədli film, Asif Rüstəmov isə bədii film rejissorluğuna görə mükafatlandırılmışlar. Rüfət Süleymanov ən yaxşı operator hesab edilmişdir. Ən yaxşı kinodebüt isə Orxan Məmmədova məxsusdur. Jurnalistlər – Pərvanə Sultanova sosial-ictimai mövzuda məqalələrinə, Füruzə Heydərova mədəniyyət problemlərinin işıqlandırılmasına, Fuad Əlizadə isə iqtisadi icmallarına görə mükafat almışlar.
Təsviri sənət sahəsində Emin Əsgərov (boyakarlıq), Faiq Əkbərov (qrafika), Xaqan Əhmədov (heykəltəraşlıq) və Könül Mehdiyeva (dekorativ- tətbiqi sənət), ədəbiyyat sahəsində Xatirə Sadıqova və Əkbər Qoşalı (poeziya), Nicat Məmmədov (tərcümə), Elnur Şükürov (nəsr) mükafata layiq görülmüşlər.
Gənclər arasında yunan-Roma güləşi üzrə dünya çempionu Rövşən Bayramova və gənclər arasında cudo üzrə Avropa birinciliyinin mükafatçısı Ramilə Yusifovaya da “Gənclər mükafatı” təqdim edilmişdir. Turizm sahəsində mükafatı Şəhriyar Əzimov və Emil Nəsibov almışlar.
Nazir Əbülfəz Qarayev, yaradıcılıq birliklərinin nümayəndələri laureatları təbrik edərək, onlara yeni uğurlar arzuladılar. Mərasimdə çıxış edən mükafatçılar onlara göstərilən diqqətə görə təşəkkürlərini bildirərək, Vətənin tərəqqisi naminə bundan sonra da səylərini əsirgəməyəcəklərini vurğuladılar.
Bölmənin digər xəbərləri
