Xəbər verdiyimiz kimi, Yeni Azərbaycan Partiyası iyunun 13-də Şəhriyar adına Mədəniyət Mərkəzində 15 iyun - Milli Qurtuluş gününə həsr edilmiş təntənəli toplantı keçirmişdir.

Toplantıda YAP-ın şəhər və rayon təşkilatlarının fəalları, ictimaiyyətin nümayəndələri, Milli Məclisin deputatları iştirak edirdilər.

YAP-ın icraçı katibi, Milli Məclisin deputatı Əli Əhmədov toplantını açaraq dedi ki, Milli Qurtuluş günü Azərbaycanın müasir tarixində dönüş mərhələsinin əsasını qoymuşdur. 1993-cü ilin iyununda Azərbaycan, onun vətəndaşları fəlakətdən, qorxu və vahimələrdən xilas olmuşlar. Azərbaycanda hərc-mərclik, özbaşınalıq, qeyri-müəyyənlik dövrü sona çatmış, ölkəmiz sabitlik, əmin-amanlıq, dinclik dövrünə qədəm qoymuşdur. Məhz həmin gündən Azərbaycan müstəqil, demokratik, hüquqi, dünyəvi dövlət kimi inkişaf etməyə başlamışdır. Yeni Azərbaycan Partiyasını yaradan Heydər Əliyev xalqın ona bəslədiyi ümidləri gündəlik fəaliyyəti ilə doğrultmuşdur. Ona görə də Qurtuluş günü bütün Azərbaycan xalqının ən əlamətdar bayramlarından biridir.

Toplantıda YAP idarə heyətinin üzvü, Milli Məclisin deputatı professor Nizami Xudiyev - Qurtuluş günü haqqında geniş məruzə etdi. O dedi ki, 1993-cü il iyunun əvvəllərində Azərbaycan xalqı yenicə əldə etdiyi müstəqilliyini itirmək, ölkə parcalanmaq təhlükəsi ilə qarşılaşmışdı. Yaxın-uzaq imperiya maraqları, daxili və xarici düşmən fitnələri ilə baş qaldıran “Sadval”, “Talış-Muğan” separatizmi, ona məkrlə dəstək verən Surət Hüseynov, Əlikram Hümbətov, Rəhim Qazıyev xəyanətləri, gənc dövləti vətəndaş müharibəsi, iflas, qlobal məhvolma məqamına gətirib çatdıran Əbülfəz Elçibəyin, İsa Qəmbərovun, Pənah Hüseynovun səhvləri Azərbaycanı diz çökdürürdü. Azərbaycan öz tarixinin ən fəlakətli, böhranlı günlərini, faciəli məqamlarını yaşayırdı. Belə bir şəraitdə bütün ümidlər, Naxçıvana - dahi dövlət xadimi, müdrik siyasətçi Heydər Əliyevə dikilmişdi. Xalqımız yeganə xilas yolunu Heydər Əliyevin yenidən siyasi hakimiyyətə qayıdışında görür, çoxsaylı və təkidli müraciətlərlə onu gözləyirdi.

Heydər Əliyev bu böyük ümumxalq inamını, etimadını Azərbaycan xalqına uzun illər ərzində sədaqətli, şərəfli xidməti ilə qazanmışdır. Bu tarixi xidmətin bəzi məqamlarını xatırladan natiq dövlətimizin başçısının Azərbaycan naminə apardığı genişmiqyaslı, uzaqgörən siyasətdən, həyata keçirdiyi nəhəng quruculuq işlərindən, məkrli qüvvələrin bədxah niyyətlərinin qarşısının alınması üçün gördüyü qətiyyətli tədbirlərdən söhbət açdı.

N.Xudiyev Azərbaycan Prezidenti Heydər Əliyevin “Tarixi olduğu kimi qəbul etmək, dərk etmək və olduğu kimi qiymətləndirmək lazımdır. Tariximiz bizim üçün dərs olmalıdır” sözlərini sitat gətirərək bildirdi ki, dövlətimizin başçısı bununla xalqımızı, cəmiyyətimizi ayıq-sayıq olmağa, keçmişin ibrət dərsini tam öyrənməklə, gələcəiyn qapılarını açmağa, əbədi intibah, inkişaf yollarına çıxmağa çağırır.

YAP Siyasi Şurasının üzvü akademik Məmmədtağı Cəfərov 1993-cü ilin iyun günlərini yada salaraq dedi ki, o dövrdə ölkəmizdə xaos, qardaş qırğını, hakimiyyətə itaətsizlik hökm sürürdü. Ona görə də Azərbaycan xalqı öz xilaskarı kimi gözünü yalnız Heydər Əliyevə dikmişdi. Heydər Əliyev zamanın hökmü, Azərbaycan xalqının təkidli çağırışı və iradəsi nəticəsində, Azərbaycanı xilas etmək üçün siyasi hakimiyyətə qayıtdı və ölkəmiz dövlətçiliyini, müstəqilliyini qorudu. İndi bütün dünya dövlətləri Azərbaycana, onun qüdrətli rəhbərinə çox böyük rəğbətlə baxır, Azərbaycan Prezidenti Heydər Əliyevin şəxsiyyətinə böyük ehtiramla yanaşır, dövlətçilik təcrübəsini yüksək dəyərləndirirlər.

Natiq son 9 ildə Azərbaycanın demokratik, hüquqi, dünyəvi dövlət kimi inkişaf etməsi sahəsində əldə etdiyi uğurlar barədə konkret misallar gətirdi, görkəmli dövlət xadimi Heydər Əliyevin rəhbərliyi altında Azərbaycanın müstəqilliyinin əbədi və dönməz olacağını vurğuladı.

Milli Məclisin deputatı Vəsadət Əzizov öz çıxışında Əbdürəhman Vəzirov, Ayaz Mütəllibov və Əbülfəz Elçibəy hakimiyyətinin xalq və dövlətçilik mənafelərindən uzaq, səriştəsiz siyasətinin Azərbaycanı uçuruma gətirib çıxarması barədə konkret faktlar söylədi. Həmin illərdə ölkəmizdə baş vermiş faciəli hadisələrdən söhbət açan deputat dedi ki, o dövrdə təkcə dövlətçiliyimizə qarşı deyil, hər bir azərbaycanlıya qarşı real təhlükə yaranmışdı. Ən böyük faciə o idi ki, cəmiyyətdə böyük ümidsizlik hökm sürürdü. O vaxtkı iqtidara artıq heç kəs inanmırdı. Xalqı həmin çətin vəziyyətdən yalnız bir şəxs - Heydər Əliyev çıxara bilərdi. Belə də oldu.

Heydər Əliyevin rəhbərliyə yenidən qayıdışı Azərbaycan üçün əsl Qurtuluş oldu. Keçmiş iqtidarın uğursuz rəhbərliyi dövründə yaranmış problemləri aradan qaldırmaq üçün ardıcıl tədbirlər görüldü. Xalqın sağlam qüvvələri bu problemlərin həllinə səfərbər edildi.

Azərbaycan Dövlət Tibb Universitetinin tələbəsi Sevinc Təbrizli çıxışında Qurtuluş günü ilə başlanan müasir tariximizin son 9 illik dövründə əldə olunmuş nailiyyətlərdən danışaraq vurğuladı ki, bütün bunlara görə xalqımız özünün xilaskar rəhbərinə minnətdardır. Bugünkü sabitliyi, əmin-amanlığı xalqımıza məhz Heydər Əliyev bəxş etmişdir. Möhtərəm Heydər Əliyevin hakimiyyətə qayıdışı həlli çətin görünən bir çox məsələləri reallığa çevirdi. Azərbaycan bütün dünyada tanındı.

Xalqımızın üzləşdiyi çətinliklərin aradan qaldırılmasında hər bir vətəndaşın, o cümlədən gənclərimizin yaxından iştirakının, Azərbaycanın xoşbəxt gələcəyə doğru irəliləməsində səylərini əsirgəməməsinin zəruriliyini bildirən S.Təbrizli respublikamızda səhiyyə sahəsində aparılan islahatlardan da danışdı.

Sonra çıxış edən YAP Siyasi Şurasının üzvü Asif İmaməliyev bildirdi ki, XX əsrdə Azərbaycan xalqı ikinci dəfə müstəqilliyini əldə etdikdən sonra ölkəmizdə ictimai-siyasi, iqtisadi şərait ziddiyyətli və fəlakətli idi. Bir tərəfdən, erməni faşistlərinin Azərbaycana qarşı ərazi iddiası nəticəsində düçar olduğumuz müharibə, digər tərəfdən isə, Azərbaycanda hakimiyyət uğrunda mübarizə aparan qüvvələrin fəaliyyəti gərgin vəziyyət yaratmışdı. Bu isə ölkənin ayrı-ayrı hərbi-siyasi qüvvələr tərəfindən parçalanaraq idarə olunmasını, müstəqilliyimizin itirilməsini reallaşdırırdı. Belə qorxulu və çətin anda beynəlxalq nüfuza malik görkəmli siyasi xadim, vətənsevərliyini, millətsevərliyini öz zəngin həyat yolu ilə sübut etmiş Heydər Əliyev xalqın tələbi ilə xilaskarlıq missiyasını öz üzərinə götürdü. Məhz həmin gün - 1993-cü il iyunun 15-i Milli Qurtuluş günü kimi Azərbaycan xalqının tarixinə əbədi daxil olmuşdur. Məhz həmin gündən başlayaraq, Azərbaycan dünya ölkələri ilə və xüsusilə də qonşu dövlətlərlə sağlam münasibətlər yaratmaq və bunları inkişaf etdirmək xətti götürdü. Ölkə daxilində separatçılığın, dövlət çevrilişi cəhdlərinin qarşısı qətiyyətlə alındı. Ordu quruculuğuna başlandı.

Natiq onu da vurğuladı ki, bu gün özlərini müxalifət adlandıran, hakimiyyətə can atan qüvvələr ölkədə yaranmış demokratik şəraitdən istifadə edərək, Azərbaycanda yenidən hərc-mərclik yaratmağa və bu yolla niyyətlərini reallaşdırmağa cəhd göstərirlər. Lakin onlar dərk etməlidirlər ki, hakimiyyətə gəlməyin bir yolu var və bu da seçki yoludur. Azərbaycan xalqı isə, ötən seçkilərdə olduğu kimi, yenə də özünün sınanmış liderinə, xilaskarına, müdrik Heydər Əliyevə etimad göstərəcəkdir.

Demokratik Azərbaycan Dünyası Partiyasının sədri, Siyasi Partiyaların Məşvərət Məclisinin sədri Məmməd Əlizadə çıxışında xatırlatdı ki, Azərbaycanın görkəmli şəxsiyyətləri yurdumuzu müqəddəs bir varlıq kimi sevərək onu bəlalardan qorumuş, tariximizə şanlı səhifələr yazmışlar. Azərbaycan 1993-cü ilin yayında da ciddi sınaqlar qarşısında qalmışdı. AXC-Müsavat cütlüyü bir il çəkən səriştəsiz hakimiyyəti ölkəmizi müstəqilliyini itirmək həddinə çatdırmışdı. Belə bir ağır, təhlükəli dövrdə möhtərəm Heydər Əliyev xalqın dadına yetişdi. Bu qayıdışla o, Azərbaycanda vətəndaş müharibəsini aradan qaldırdı. Düşmənlərimizin Azərbaycanı parçalamaq, məhv etmək planlarını puça çıxardı. Xalqımız, müstəqil Azərbaycan fəlakətdən xilas oldu. Heydər Əliyev öz Qayıdışı ilə tariximizə Qurtuluş səhifəsi yazdı.

X x x

Toplantı iştirakçıları Yeni Azərbaycan Partiyasının sədri, respublika Prezidenti Heydər Əliyevə təbrik məktubu qəbul etdilər.

Axırda incəsənət ustalarının iştirakı ilə konsert oldu.

X x x

Toplantıda YAP sədrinin müavini, Milli Məclisin sədri Murtuz Ələsgərov, Prezidentin İcra Aparatının rəhbəri Ramiz Mehdiyev, Milli Məclis sədrinin və baş nazirin müavinləri, Bakı Şəhər İcra Hakimiyyətinin başçısı Hacıbala Abutalıbov və digər rəsmi şəxslər iştirak edirdilər.

AZƏRTAC

Foto Namiq Məmmədovundur