QAN YADDAŞI
MİNGƏÇEVİRDƏ “ŞƏHİDLİYİMİZ QƏHRƏMANLIĞIMIZDIR” MÖVZUSUNDA ELMİ-NƏZƏRİ KONFRANS KEÇİRİLMİŞDİR
Mingəçevir, 19 yanvar (AZƏRTAC). Mingəçevir Şəhər Gənclər və İdman İdarəsi 20 Yanvar faciəsinin növbəti ildönümü ilə əlaqədar “Şəhidliyimiz qəhrəmanlığımızdır” mövzusunda elmi-nəzəri konfrans keçirmişdir.
Şəhər icra hakimiyyətinin, idarə və təşkilatların, ali və orta təhsil müəssisəsi rəhbərlərinin, gənclərin iştirakı ilə təşkil edilən tədbirdə şəhidlərin xatirəsi bir dəqiqəlik sükutla yad edilmişdir.
Tədbirdə Mingəçevir Şəhər Gənclər və İdman İdarəsinin rəisi Ramiz Əliyev 1990-cı il yanvarın 20-də Bakı şəhərində sovet hərbçiləri tərəfindən törədilmiş faciənin dəhşətlərindən danışaraq bunun bəşər tarixində görünməmiş qanlı hadisə olduğunu bildirmişdir. Natiq 20 Yanvar faciəsinin əsl mahiyyətinin dünyaya çatdırılmasında və ona siyasi qiymət verilməsində ulu öndər Heydər Əliyevin böyük xidmətləri olduğunu vurğulamışdır.
İdarə rəisinin müavini Kamal Nəcəfli “Şəhidliyimiz qəhrəmanlığımızdır”, Mingəçevir Politexnik İnstitutu tələbə gənclər təşkilatının (TGT) sədri Zaur Əliyev “Tarixin qan yaddaşı”, Azərbaycan Müəllimlər İnstitutunun Mingəçevir filialı TGT-nin sədri Türkay Abbasova “Şəhidlər bizim qürur mənbəyimizdir”, Mingəçevir Turizm Kolleci TGT-nin sədri Samir Həsənov “Şəhidlər bizim and yerimizdir” mövzusunda məruzələr etmişlər.