Minskdə “Heydər Əliyev və xalqlar dostluğu” mövzusunda elmi-praktik konfrans təşkil olunub
Minsk, 4 may, AZƏRTAC
Belarusun paytaxtı Minsk şəhərində ümummilli lider Heydər Əliyevin anadan olmasının 95-ci ildönümü münasibətilə “Heydər Əliyev və xalqlar dostluğu” mövzusunda elmi-praktik konfrans keçirilib.
AZƏRTAC xəbər verir ki, Belarus Azərbaycan İcmaları Konqresinin və Maksim Tanka adına Belarus Dövlət Pedaqoji Universitetinin birgə təşkilatçılığı ilə keçirilən konfransda bu ölkənin tanınmış elm xadimləri, Azərbaycan səfirliyinin əməkdaşları, diaspor və media təmsilçiləri iştirak ediblər.
Heydər Əliyevi dünyanın tanınmış ictimai-siyasi xadimi adlandıran Maksim Tanka adına Belarus Dövlət Pedaqoji Universitetinin rektoru Aleksandr Juk Ulu Öndəri müstəqil Azərbaycan dövlətinin qurucusu olmaqla yanaşı, xalqlar dostluğunun əsl tərənnümçüsü kimi xarakterizə edib. Rektor Azərbaycanla Belarus arasında tarixi dostluq əlaqələrinin möhkəm əsaslar üzərində qurulmasının da məhz Heydər Əliyevin adı ilə bağlı olduğunu vurğulayıb.
Konfransda universitetin birinci prorektoru Svetlana Koptiyeva, filologiya fakültəsinin dekanı Vasili Stariçonok, Azərbaycanın Belarusdakı səfirliyinin birinci katibi Namiq Niftullayev, Belarus İcmaları Konqresinin sədr müavini Rövşən Əliyev, konqresin İdarə Heyətinin üzvləri Məzahir Yusifov, Gülnarə İmanova və digərləri çıxış edərək ulu öndər Heydər Əliyevin zəngin və şərəfli həyat yolundan söz açıblar. Dahi Heydər Əliyevin dövlətçilik ideologiyasının Prezident İlham Əliyev tərəfindən uğurla davam etdirildiyini diqqətə çatdıran natiqlər ölkəmizin inkişaf edərək beynəlxalq arenada böyük nüfuz sahibinə, Cənubi Qafqazda lider dövlətə çevrilməsinin fərəhləndirici hal olduğunu bildiriblər.
Tədbirdə Maksim Tanka adına Belarus Dövlət Pedaqoji Universiteti ilə Bakı Slavyan Universiteti arasında telekörpü təşkil olunub. Bakı Slavyan Universitetinin prorektoru Rafiq Novruzov, Belarus Azərbaycan İcmaları Konqresinin sədri Natiq Bağırov, Azərbaycanda Belarus Mədəniyyəti və Dili Mərkəzinin direktoru Albina Seyidova və digərləri Heydər Əliyevin siyasi irsinin öyrənilməsinin, onun zəngin həyat fəlsəfəsinin elmi şəkildə araşdırılmasının vacibliyindən söz açıblar. Telekörpüdə Maksim Tanka adına Belarus Dövlət Pedaqoji Universitetinin tələbələrinin və Belarus Azərbaycan İcmaları Konqresinin gənclər təşkilatının fəalları Ulu Öndər və Azərbaycanla bağlı şerlər söyləyiblər.
İştirakçılar ümummilli lider Heydər Əliyev haqqında sənədli filmə baxıb, Ulu Öndərin zəngin həyat yolu ilə tanış olublar. Tədbir konsert proqramı ilə davam edib. Sonda tələbələrə hədiyyələr və diplomlar təqdim edilib.
Emil Hüseynli
AZƏRTAC-ın xüsusi müxbiri
Minsk
Bölmənin digər xəbərləri
