MİŞEL PLATİNİ UEFA-NIN YENİ PREZİDENTİDİR
AZƏRTAC xarici KİV-lərə istinadla xəbər verir ki, Mişel Platini UEFA-nın yeni prezidenti olmuşdur. O, bu vəzifəyə UEFA-nın Düsseldorfda keçirilən XXXI konqresində səsvermə nəticəsində seçilmişdir. 51 yaşlı Platiniyə 27 nümayəndə səs vermişdir. Onun rəqibi, artıq eks-prezident Lennart Yuhansson 23 səs almış, iki bülleten etibarsız sayılmışdır.
Avropa futbolunun başçısı vəzifəsinə seçilən Platini UEFA-ya rəhbərlik etdiyi 17 il ərzində qurumun inkişafına verdiyi böyük töhfəyə görə Yuhanssonu qurumun fəxri prezidenti seçməyi təklif etmişdir. Platini demişdir ki, hörmət, dözümlülük, həmrəylik, azadlıq kimi idman dəyərlərinin keşiyində durub, futbolun müstəqilliyini bundan sonra da müdafiə edəcək, dopinq və qeyri-leqal qaydalarla mübarizə aparacaqdır.
Bölmənin digər xəbərləri
