Mixail Kavelaşvili: Ölkənin məhv olmaq təhlükəsi hələ də aradan qalxmayıb
Tbilisi, 4 fevral, AZƏRTAC
“Gürcüstanın bir ölkə kimi məhv olmaq təhlükəsi hələ də aradan qalxmayıb. Ölkədə sabitliyi pozmaq üçün səylərini əsirgəməyən antigürcü qüvvələr hələ də var”.
AZƏRTAC xəbər verir ki, bu sözləri Gürcüstan Prezidenti Mixail Kavelaşvili bu gün parlamentin yaz sessiyasının açılış mərasimindəki çıxışı zamanı söyləyib.
Kavelaşvilinin sözlərinə görə, təhlükə Ukraynada müharibə bitənə və Gürcüstanda xarici maraqları təşviq edən qruplar zəifləməyənə qədər davam edəcək: “Mənin fikrimcə, Ukraynada müharibə bitənə və Gürcüstanda xarici maraqları güdən qruplar daha da zəifləməyənə qədər təhlükə yüksək olaraq qalacaq. Son bir neçə ildə dövlətimiz bizi müharibəyə, sabitliyi pozmağa və inqilaba çəkmək cəhdlərinə qətiyyətlə cavab verdi. Bu illəri Gürcüstanın xilas dövrü adlandırmaq olar. Ölkənin xilas edilməsində əsas rolu kritik anlarda emosiyaları bir kənara qoyub, xüsusi ehtiyatla, müdrikliklə, vətənpərvərliklə qərarlar qəbul edən, dövlətə dəstək verən, Gürcüstanın məhvinin qarşısını alan gürcü xalqı oynayıb. Ona görə də gürcü xalqının iradəsi, dövlətçiliyimiz və milli dəyərlərimiz bədxahların əsas hədəfindədir. Çünki bilirlər ki, ölkəmizin gücü də buna əsaslanır. Müvafiq olaraq, biz yalnız öz milli maraqlarımızdan çıxış etməyə davam etməli və son nəticədə ölkəmizi təhlükəsizliyə aparmalıyıq”.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
