DÜNYA
MOSKVA MİLİSİ QÜCLƏNDİRİLMİŞ XİDMƏT REJİMİNƏ KEÇİR
Moskva Baş Daxili İşlər İdarəsinin /BDİİ/ əməkdaşı, milis polkovniki Sergey Şevtsov İTAR-TASS-ın müxbirinə bildirmişdir ki, BDİİ-nın rəisi Vladimir Proninin sərəncamına əsasən, şəhər milisi aprelin 19-22-də gücləndirilmiş xidmət rejimində işləyəcəkdir.
Onun dediyinə görə, metro stansiyaları, vağzallar və istirahət yerləri xüsusi nəzarətə götürüləcəkdir. “Qırxıqbaşlar”, “Rus milli birliyi“, “Rus yumruğu” kimi millətçi qruplaşmaların liderlərini aşkar etmək üçün xüsusi tədbirlər görülür. Hitlerin anadan olduğu gün /aprelin 20-si/millətçi qruplaşmaların Rusiyanın iri şəhərlərində aksiyalar hazırladığı barədə operativ məlumat alındığı üçün bütün təhlükəsizlik tədbirləri görülmüşdür.
S.Şevtsov demişdir:”Bundan əlavə, Moskvada xarici dövlətlərin diplomatik nümayəndəliklərinin mühafizəsi də gücləndirilmişdir.”
O, həmçinin bildirmişdir ki, son vaxtlar bu qruplaşmalar tərəfindən əcnəbilərin ünvanına hədələr artmışdır. Ötən həftə bir sıra səfirliklər “qırxıqbaşlar”dan elektron poçtu ilə hədələyici məktublar almışlar. Həmin məktublarda onlar “gözlərinə dəyən əcnəbiləri öldürəcəklərini” bildirir və bu şəxslərə “Rusiyanı dərhal tərk etməyi” məsləhət görürlər.
S.Şevtsovun sözlərinə görə, Moskva milisi qayda-qanunu təmin etmək üçün bütün bölmələrin çəlb olunduğu xüsusi tədbirlər kompleksi hazırlamışdır.