MƏDƏNİYYƏT
Moskvada şairə Lalə Həsənovanın yaradıcılıq gecəsi keçirilib
Moskva, 6 dekabr, AZƏRTAC
Moskvada M.İ.Rudomino adına Xarici Ədəbiyyat Kitabxanasında Heydər Əliyev Fondunun Rusiyadakı nümayəndəliyi və Azərbaycan Mədəniyyət Mərkəzinin dəstəyi ilə Azərbaycan şairi Lalə Həsənovanın yaradıcılığına həsr olunmuş poeziya gecəsi keçirilib.
AZƏRTAC xəbər verir ki, tədbirdə çıxış edən Heydər Əliyev Fondunun Rusiya Federasiyasındakı nümayəndəliyinin direktor müavini Nazim İsmayılzadə Azərbaycan ilə Rusiya arasında mədəni əlaqələrin möhkəmləndirilməsi üçün bu formatda tədbirlərin keçirilməsinin vacibliyini vurğulayıb. O, Heydər Əliyev Fondunun Rusiya nümayəndəliyinin iki ölkə arasında humanitar əməkdaşlığın inkişafına böyük töhfələrindən danışıb.
Şairə L.Həsənova bu gecəni keçirmək üçün yaratdığı imkana görə təşkilatçılara təşəkkürünü bildirib. O, 3 il ərzində uğurla rəhbərlik etdiyi Bakıdakı Rus evinin ədəbi layihəsindən danışıb. Bildirib ki, bu müddət ərzində ona öz qabiliyyətlərini təkmilləşdirmək və inkişaf etdirmək üçün fürsət axtaran çoxlu sayda istedadlı gənclər qoşulub. L.Həsənovanın rəhbərliyi ilə layihədə 100-dən çox iştirakçı – gənc şairlər, nasirlər və hətta musiqiçilər də özlərini göstərə bilib. Tədbir zamanı layihənin işindən bəhs edən videoçarx nümayiş etdirilib.
Daha sonra L.Həsənova həyatının müxtəlif dövrlərində qələmə aldığı sevimli şeirlərini tamaşaçılarla bölüşüb.
Tədbirin qonaqları Azərbaycan Mədəniyyət Mərkəzinin fəalları, yazıçılar, tənqidçilər, kinorejissorlar, eləcə də gənc yazıçılar olublar.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
