Müasir dövrdə polisin ən böyük üstünlüyü cəmiyyətin ona olan etimadıdır - ŞƏRH
Bakı, 2 iyul, AZƏRTAC
Azərbaycan polisinin 108 illik tarixini təkcə bir hüquq-mühafizə orqanının yubileyi kimi qiymətləndirmək doğru olmaz. Bu tarix, əslində, Azərbaycan dövlətçiliyinin keçdiyi yolun bir hissəsidir.
Bunu AZƏRTAC-a açıqlamasında “Konstitusiya” Araşdırmalar Fondunun rəhbəri Əliməmməd Nuriyev bildirib.
“Müstəqilliyimizin ilk illərini xatırlayaq. Dövlət institutlarının ciddi sınaqlarla üzləşdiyi, cinayətkarlığın artdığı, ictimai təhlükəsizliyin ciddi risk altında olduğu bir dövrdən keçmişik. Məhz həmin şəraitdə Ümummilli Lider Heydər Əliyevin həyata keçirdiyi dövlət quruculuğu siyasəti hüquq-mühafizə sisteminin də yenidən formalaşmasına imkan verdi. Polis orqanlarında qanunçuluğun, intizamın və peşəkarlığın möhkəmləndirilməsi həmin siyasətin mühüm tərkib hissəsi idi. Sonrakı mərhələdə Prezident İlham Əliyev bu siyasəti yeni dövrün çağırışlarına uyğun davam etdirdi. Artıq söhbət təkcə cinayətlərin açılmasından getmirdi. Söhbət müasir texnologiyaların tətbiqindən, rəqəmsal idarəetmədən, kibercinayətkarlıqla mübarizədən, polis əməkdaşlarının sosial təminatının gücləndirilməsindən və vətəndaş məmnunluğunun artırılmasından gedirdi”, - deyə o vurğulayıb.
Əliməmməd Nuriyev Daxili İşlər Nazirliyi yanında İctimai Şuranın sədri kimi müxtəlif bölgələrdə vətəndaşlarla görüşlər keçirdiyini diqqətə çatdırıb: “Açığını deyim ki, son illər bir tendensiyanı daha aydın görürəm. İnsanlar polisə əvvəlki kimi yalnız cinayət baş verəndən sonra müraciət etmirlər. Onlar təhlükəsizliklə bağlı narahatlıqlarını bölüşür, hüquqi məsləhət istəyir, kiberdələduzluq, məişət zorakılığı, narkotik təhlükəsi ilə bağlı müraciət edirlər. Bu isə onu göstərir ki, polisin cəmiyyətdə rolu da, ondan gözləntilər də dəyişib. Mənim qənaətim belədir ki, 108 ilin ən böyük nəticəsi ondan ibarətdir ki, Azərbaycan polisi klassik hüquq-mühafizə modelindən çıxaraq müasir təhlükəsizlik institutuna çevrilmək istiqamətində ardıcıl inkişaf edir”.
“Konstitusiya” Araşdırmalar Fondunun rəhbəri ötən müddətdə polis sistemində əldə olunan mühüm islahatlara da toxunub. “Mən islahatları sadalamaqdan daha çox onların mahiyyətinə diqqət yetirərdim. Ən mühüm dəyişiklik düşüncə tərzində baş verib. Bu gün polis təkcə qanunu tətbiq edən orqan deyil, həm də vətəndaşa xidmət göstərən dövlət institutudur. Bu yanaşma təsadüfi yaranmayıb. Onun arxasında uzun illər aparılan institusional islahatlar dayanır. Əlbəttə, qanunvericilik bazası təkmilləşdirilib, texniki imkanlar genişlənib, rəqəmsal texnologiyalar tətbiq olunub. Amma fikrimcə, ən böyük yenilik xidmət fəlsəfəsinin dəyişməsidir. Bu gün patrul xidməti də, kibercinayətkarlıqla mübarizə aparan əməkdaş da, istintaqçı da bilməlidir ki, onun fəaliyyəti vətəndaşın dövlət haqqında formalaşdırdığı təsəvvürə birbaşa təsir göstərir. İctimai Şurada fəaliyyətimiz zamanı bunun praktiki nəticələrini də görürük. Elə müraciətlər olur ki, məsələ hüquqi baxımdan mürəkkəb deyil. Sadəcə vətəndaş dinlənilmək, ona obyektiv münasibət göstərilməsini istəyir. Bu münasibət formalaşanda həm narazılıq azalır, həm də dövlətə inam güclənir. Ona görə hesab edirəm ki, polis sistemində ən uğurlu islahat məhz peşəkarlığın, müasir idarəetmənin və vətəndaşyönümlü yanaşmanın paralel inkişaf etməsidir”, - deyə Əliməmməd Nuriyev qeyd edib.
Əliməmməd Nuriyev müasir dövrdə polisin qarşısında duran əsas çağırışlara da diqqətə çəkib: “Burada bir məqamı qarışdırmaq olmaz. Əvvəllər cinayət daha çox küçədə törədilirdi. Bu gün isə mobil telefonda, kompüterdə, sosial şəbəkədə də törədilir. Kiberdələduzluq, şəxsi məlumatların oğurlanması, süni intellekt texnologiyalarından istifadə etməklə törədilən cinayətlər artıq bütün dünyada hüquq-mühafizə orqanlarının əsas gündəlik məsələlərindən biridir. Azərbaycan da bu proseslərdən kənarda deyil. Digər ciddi problem narkotik vasitələrin qanunsuz dövriyyəsidir. 2025-ci ilin statistikası göstərir ki, ölkədə qeydə alınan cinayətlərin təxminən dörddəbiri bu sahə ilə bağlı olub. Bu rəqəm problemin miqyasını göstərməklə yanaşı, polis əməkdaşlarının üzərinə düşən yükü də göstərir. Amma hesab edirəm ki, təhlükəsizlik yalnız polisin işi deyil, bu, cəmiyyətin ortaq məsuliyyətidir. Ailə də, məktəb də, media da, vətəndaş cəmiyyəti də bu prosesdə iştirak etməlidir. Polis bu mübarizənin ön xəttindədir, amma tək deyil. Bir məsələni də xüsusi vurğulamaq istəyirəm. Müasir dövrdə polisin ən böyük üstünlüyü onun səlahiyyətləri yox, cəmiyyətin ona olan etimadıdır. Etimad olmayan yerdə ən müasir texnologiya da gözlənilən nəticəni verməyəcək. Fikrimcə, qarşıdakı illərin əsas vəzifəsi də məhz budur: peşəkar, texnoloji imkanları güclü, qanuna söykənən və cəmiyyətlə etimada əsaslanan polis modelini daha da inkişaf etdirmək. Hesab edirəm ki, son illər həyata keçirilən islahatlar da məhz bu strateji məqsədə xidmət edir”.
Bölmənin digər xəbərləri
