MÜDAFİƏ NAZİRLİYİNDƏ GÖRÜŞ
Azərbaycanın və Rusiyanın dövlət himni səslənmişdir.
Rusiyanın müdafiə naziri fəxri qarovul dəstəsinin önündən keçmişdir.
Rəsmi qarşılanma mərasimindən sonra hər iki ölkənin müdafiə nazirlərinin təkbətək və nümayəndə heyətlərinin iştirakı ilə geniş tərkibdə görüşü olmuşdur.
General-polkovnik Səfər Əbiyev demişdir ki, Azərbaycan Rusiya ilə bütün sahələrdə uğurla inkişaf edən, Qafqazda sülhün və sabitliyin təmin edilməsinə istiqamətlənmiş əməkdaşlığa böyük əhəmiyyət verir. Ümidvaram ki, bu səfər ölkələrimiz arasında hərbi və hərbi-texniki əməkdaşlığın inkişafına təkan verəcəkdir.
Sergey İvanov son dövrdə Rusiya və Azərbaycan münasibətlərinin yüksələn xətlə inkişaf etdiyini bildirmiş, 2006-cı ilin Azərbaycanda Rusiya Federasiyası ilinin elan olunmasını bunun daha bir sübutu adlandırmışdır.
Səfər Əbiyev Cənubi Qafqaz regionunda mövcud olan hərbi-siyasi vəziyyətə toxunaraq demişdir ki, Ermənistanın işğalçılıq siyasəti nəticəsində bölgədə mürəkkəb və gərgin vəziyyət qalmaqdadır. Ermənistanda və işğal olunmuş Azərbaycan ərazilərində külli miqdarda hərbi texnikanın, silah və sursatın toplanması, Gürcüstanda yerləşən Rusiya hərbi bazalarından çıxarılan əmlakın Ermənistan ərazisində yerləşdirilməsi və Rusiya-Ermənistan birgə təlimlərinin keçirilməsi bizi çox narahat edir. O, Ermənistanın işğal etdiyi Azərbaycan ərazilərində bütün infrastrukturun dağıdıldığını, məhv edildiyini və bu nəzarətsiz bölgədən qeyri-qanuni məqsədlər üçün istifadə olunduğunu bildirmişdir. Nazir demişdir ki, Ermənistan buna görə cavab verəcəkdir. Əgər Ermənistan beynəlxalq hüquq normalarına riayət edərək, işğal olunmuş əraziləri boşaltmasa, Azərbaycan öz torpaqlarının azad edilməsi üçün müvafiq addımlar atacaqdır.
Ölkəmizin müdafiə naziri təəssüf ki, bu günə kimi Müstəqil Dövlətlər Birliyi Ermənistanın işğalçı dövlət olduğuna münasibət bildirməmiş, Ermənistan-Azərbaycan, Dağlıq Qarabağ münaqişəsinin Azərbaycanın ərazi bütövlüyü çərçivəsində həlli istiqamətində əməli addımlar atmamışdır. Ümid edirəm, Rusiya bu problemin həlli yolunda səylərini artıracaqdır.
Sergey İvanov demişdir ki, Rusiya münaqişənin həllində birtərəfli mövqe tutmur, bu istiqamətdə səylərini artırır. Siz qısa müddətdə bunun şahidi olacaqsınız.
Sonra tərəflər beynəlxalq və regional təhlükəsizlik, terrorizm, ikitərəfli hərbi əməkdaşlığın istiqamətləri, hərbi kadrların hazırlanması sahəsində gələcək əməkdaşlıq, “Dəryal” Analitik İnformasiya Mərkəzinin fəaliyyəti (Qəbələ RLS) və qarşılıqlı maraq doğuran digər məsələlər ətrafında geniş fikir mübadiləsi aparmışlar.
X X X
X X X
Görüşdən sonra brifinq keçirilmişdir. Azərbaycanın müdafiə naziri general-polkovnik Səfər Əbiyev brifinqi açaraq demişdir ki, ölkəmiz Qafqazda sabitliyin, dövlətimizin ərazi bütövlüyünün və sərhədlərinin toxunulmazlığının tərəfdarı olan Rusiya ilə əməkdaşlığın əldə edilmiş yüksək səviyyəsinə böyük əhəmiyyət verir. Azərbaycan Respublikasının Prezidenti İlham Əliyevin və Rusiya Federasiyasının Prezidenti Vladimir Putinin dəfələrlə keçirdikləri görüşlər dövlətlər arasında münasibətlərin xeyli möhkəmlənməsinə təkan vermiş, bu münasibətlər ardıcıl surətdə inkişaf etməkdədir.
S.Əbiyevin sözlərinə görə, danışıqlar səmərəli keçmişdir. Qafqazda hərbi-siyasi vəziyyət, Azərbaycan torpaqlarının Ermənistan tərəfindən işğalı, Ermənistan ərazisində böyük miqdarda silah və hərbi texnika toplandığı barədə məsələlər barədə söhbət getmişdir. Tərəflər hərbi və hərbi-kosmik əməkdaşlıq və müdafiə sahəsində tərəfdaşlığı daha da genişləndirmək məsələlərini də müzakirə etmişlər.
Azərbaycana rəsmi səfərə dəvətə görə həmkarı Səfər Əbiyevə minnətdarlıq edən Rusiyanın müdafiə naziri Sergey İvanov bildirmişdir ki, son 4-5 ildə Azərbaycan ilə Rusiya arasında münasibətlərin bütün sahələrində - iqtisadi, mədəni və digər sahələrdə əməkdaşlıqda böyük və prinsipcə mühüm dəyişikliklər baş vermişdir. Qarşılıqlı münasibətlər təhlükəsizlik, müdafiə, hərbi və hərbi-texniki əməkdaşlıq kimi həssas sahədə də kifayət qədər dinamik inkişaf edir.
Sergey İvanov demişdir ki, görüşdə həm Qafqazda, həm də Yaxın və Orta Şərqdə - qeyri-sabitlik zonalarında vəziyyətlə bağlı bir sıra məsələlər müzakirə edilmişdir. Qlobal təhlükəsizliyin bir çox cəhətləri həmin zonalarda sülh və əmin-amanlıqla bağlıdır. Tərəflər Qəbələdəki radiolokasiya stansiyasının (RLS) fəaliyyəti məsələsindən də danışmışlar. S.İvanovun sözlərinə görə, bu stansiya ilə bağlı problem yoxdur və o, RLS barəsində 2002-ci ildə əldə edilmiş bütün razılaşmaların qətiyyətlə, ardıcıl surətdə yerinə yetirilməsindən razıdır.
S.İvanov hərbi-texniki əməkdaşlığın gücləndirildiyini vurğulayaraq bildirmişdir ki, hazırda hərbi-texniki əməkdaşlıq üzrə hökumətlərarası komissiya faktik olaraq formalaşdırılmışdır. Danışıqlarda komissiyanın Rusiya tərəfindən nümayəndəsi – Federal Hərbi-Texniki Əməkdaşlıq Xidməti direktorunun müavini Aleksandr Fomenko da iştirak edir.
Rusiya naziri demişdir ki, görüşdə bütün beş Xəzəryanı dövlətin bu dənizdə qayda-qanun yaradılması sahəsində səylərini əlaqələndirmək məsələləri də müzakirə olunmuş, bildirilmişdir ki, Xəzərdə çox ciddi problemlər var – bütün sahil boyunca qiymətli növlərdən olan balıqlar vəhşicəsinə məhv edilir, Xəzər akvatoriyasından narkotik maddələr daşınması üçün istifadə olunur. O ki qaldı Rusiyanın Gürcüstandakı bazasından silah və döyüş texnikasının bir hissəsinin Gümrüdəki bazaya daşınmasına, bütün bunlar indiyə qədər olduğu kimi, bundan sonra da Rusiyaya məxsus olacaqdır və Ermənistana hansısa silah-sursat verilməsindən söhbət belə gedə bilməz.
Bölmənin digər xəbərləri
