MUĞAN RAYONLARINDA DA 20 YANVARA HƏSR OLUNMUŞ İZDİHAMLI ANMA MƏRASİMLƏRİ KEÇİRİLMİŞDİR
Şirvan, 20 yanvar (AZƏRTAC). Şirvan şəhərindəki “Şəhidlər” abidə kompleksinin ziyarətinə gələnlərin ardı-arası kəsilmirdi.
Vətənin müstəqilliyi və ərazi bütövlüyü uğrunda canından keçmiş igid oğul və qızlarımızın el adətinə uyğun olaraq ruhuna dualar oxunur, şəhidlərimizə Allahdan rəhmət dilənirdi. Məzarlar üzərinə əklillər qoyulur, gül-çiçək dəstələri düzülürdü. Hisslərinə hakim olmayıb göz yaşı axıdanlar da var idi. Fəqət, insanlar daha çox məğrur və nikbin görünürdülər. Axı 20 Yanvar təkcə hüzn günü yox, həm də xalqın oyanış günü, mərdlik günüdür. 20 Yanvar Azərbaycanın müstəqillik uğrunda mücadilə tarixinin qanla yazılmış ən parlaq səhifəsi kimi daim milli birlik və həmrəylik duyğuları oyadacaqdır.
Muğan bölgəsinə aid edilən İmişli, Saatlı, Sabirabad, Hacıqabul, Salyan, Neftçala və Biləsuvar rayonlarında da insanlar anma mərasimlərində əsl birlik və yekdillik göstərərək şəhid məzarlarının ziyarətinə gəlir, Vətən yolunda öz ölümü ilə əbədiyaşarlıq hüququ qazanan şəhidlərin müqəddəs xatirələrinə dərin ehtiram göstərirdilər. Torpağın üzü soyuqdur, desələr də aradan düz iyirmi il ötməsinə baxmayaraq şəhidlərə hörmət, sevgi və sayğı soyumur, əksinə hər gün artır, çoxalır.
Bölmənin digər xəbərləri
