REGİONLAR
Musiqi müəllimi taxta parçalarına yeni “həyat verir” FOTO VİDEO
![](/files/galleryphoto/2023/3/1200x630/w_161700118714367450881_1200x630.jpg)
![](/files/galleryphoto/2023/3/1200x630/w_1617001187146534739969_1200x630.jpg)
![](/files/galleryphoto/2023/3/1200x630/w_1617001187141654157961_1200x630.jpg)
![](/files/galleryphoto/2023/3/1200x630/w_1617001187144673819595_1200x630.jpg)
![](/files/galleryphoto/2023/3/1200x630/w_1617001187145696658879_1200x630.jpg)
![](/files/galleryphoto/2023/3/1200x630/w_1617001187142396960428_1200x630.jpg)
![](/files/galleryphoto/2023/3/1200x630/w_161700118714284140379_1200x630.jpg)
![](/files/galleryphoto/2023/3/1200x630/w_1617001187146470132613_1200x630.jpg)
![](/files/galleryphoto/2023/3/1200x630/w_16170011871426123689_1200x630.jpg)
Lənkəran, 16 noyabr, İlkin Adıyev, AZƏRTAC
Dekorativ tətbiqi sənətin bədii oyma növü hər bir ustadan böyük səbir tələb edir. Hazırda sənətin bu növünü yaşadanlar təəssüf ki, elə də çox deyil. Belə azsaylı sənətkarlardan biri də Lənkəran şəhər sakini Rail Yusubovdur.
AZƏRTAC-ın bölgə müxbiri xəbər verir ki, Rail Yusubov ixtisasca musiqi müəllimi olsa da, oyma sənəti ilə də məşğuldur.
“Atam və əmim dövrünün məşhur qarmon ifaçılarından olub. Mən də onlardan bu sənətin sirlərini öyrənmişəm. Sonra Lənkəran Dövlət Musiqi Kollecinə daxil olub, musiqi təhsilimi davam etdirdim. Musiqi ilə məşğul ola-ola oyma sənətinə marağım artdı. Əvvəllər bu sənətə hobbi kimi yanaşırdım. Sonralar gördüm ki, bu, məndə alınır, başladım ağacdan müxtəlif fiqurlar hazırlamağa. İlk peşəkar əl işim 2004-cü ildə hazırladığım gəmi suveniri idi”, - deyə lənkəranlı usta bildirib.
Usta iş prosesində daha çox qoz, narrat və göyrüş ağaclarından istifadə edir. Onun ən maraqlı əl işlərindən biri gəmi suveniridir. Narrat ağacından yonularaq hazırlanan bədii oyma əsəri bir ilə başa gəlib.
Oyma ustasının sözlərinə görə, bu sənət sonsuz səbir və ciddi diqqət tələb etdiyindən son dərəcə ehtiyatla işləməlisən ki, hazırladığın fiqur sınmasın, yoxsa bütün çəkdiyin zəhmət bir anda hədər gedə bilər.
Oymaçı deyir ki, bu işin çətin və zəhmətli olduğunu, incəlik tələb etdiyini hər kəs bilir. Oyma sənəti ilə məşğul olan şəxsin yaradıcılıq və rəssamlıq bacarığı da olmalıdır. O, 20 ildir bu işlə məşğul olsa da, bu sənətin sirlərini müəllimi olmadan öyrəndiyini söyləyir.
Rail Yusubov müştərilərinin çox olduğunu bildirir. “Hazırladığım məhsullara həmişə tələbat var. Bu sənət milli-mənəvi dəyərlərimiz sayılır. Hər zaman çalışıram ki, maraqlı və qeyri-adi fiqurlar hazırlayım. Əl işlərimi əsasən müxtəlif festivallarda satışa çıxarıram. Sifariş edilən əl işlərimin ölçüsündən asılı olaraq qiymətlər də fərqli olur. Gəmi suvenirini bir ilə hazırlamışam, qiyməti isə 600-700 manatdır”, - deyə lənkəranlı usta vurğulayıb.