MÜSLÜM MAQOMAYEVİN YUBİLEYİ QEYD OLUNMUŞDUR
Tədbir iştirakçıları, əvvəlcə, muzeyin foyesində yubilyarın həyat və yaradıcılığını əks etdirən sərgi ilə tanış olmuşlar.
Mədəniyyət Nazirliyinin və muzeyin birgə keçirdikləri tədbiri muzeyin direktoru, sənətşünaslıq namizədi Alla Bayramova açaraq Müslüm Maqomayevin burada qorunub saxlanılan sənədləri, dahi Üzeyir bəy Hacıbəyovun müəllif hüquqlarından istifadə ilə bağlı ona göndərdiyi vəkalətnamə və məktubları barədə məlumat vermişdir.
Mədəniyyət nazirinin müavini Sevda Məmmədəliyeva, Bakı Musiqi Akademiyasının dosenti, M.Maqomayevin tədqiqatçısı Aida Hüseynova, Salman Mümtaz adına Azərbaycan Respublikası Dövlət Ədəbiyyat və İncəsənət Arxivinin direktoru Maarif Teymurov və başqaları yubilyarın təhsil illərindən, müəllimlik və dirijorluq fəaliyyətindən, Ü.Hacıbəyovla dostluq, qohumluq, məsləkdaşlıq əlaqələrindən söz açmış, Azərbaycan operalarına xas improvizasiya prinsiplərindən kamil opera formasına keçid mərhələsində “Şah İsmayıl”ın tarixi əhəmiyyətindən danışmışlar. Azərbaycanda kütləvi mahnı janrının yaradıcılarından olan sənətkarın xalqımızın musiqi təhsili məsələlərinə də böyük diqqət verdiyi vurğulanmışdır.
Tədbirdə bəstəkarın əsərlərindən ibarət geniş konsert proqramı olmuşdur. Azərbaycan Dövlət Mədəniyyət və İncəsənət Universitetinin xalq çalğı alətləri orkestri, Opera və Balet Teatrının solistləri Müslüm Maqomayevin əsərlərindən, o cümlədən “Şah İsmayıl” operasından parçalar ifa etmişlər.
Bölmənin digər xəbərləri
