Müstəqil Azərbaycanın qurucusu Heydər Əliyevin öz xalqına xidmətləri yaddaşlara əbədi həkk olunub
Bakı, 12 iyun, AZƏRTAC
Milli Qurtuluş Günü ulu öndər Heydər Əliyev və dövlətimizin müstəqillik tarixi ilə bağlı olan gündür. Müstəqil Azərbaycanın qurucusu Heydər Əliyevin öz xalqına təmənnasız xidmətləri yaddaşlara əbədi həkk olunub. Böyük azərbaycanlının ikinci dəfə hakimiyyətə gəlişindən sonra Azərbaycan cəmiyyətində müstəqil dövlətçilik ideyaları fundamental mahiyyət kəsb etməyə başladı. Məhz Ulu Öndərin uzaqgörən siyasəti nəticəsində Azərbaycan dünyanın siyasi xəritəsində geostrateji mövqeyini möhkəmləndirə bildi. Heydər Əliyev ictimai-siyasi sabitliyi təmin etməklə demokratik dövlət modeli konsepsiyasını həyata keçirməyə başladı. Azərbaycan özünün əsl müstəqilliyini ulu öndər Heydər Əliyevin qayıdışından sonra əldə etdi. Məhz onun zəngin siyasi təcrübəsi, yüksək idarəçilik bacarığı, Vətəninə və xalqına tükənməz sevgisi Azərbaycanın dövlət müstəqilliyini təhlükədən qurtardı. Ulu Öndər Azərbaycanı, xalqını ölkədəki xaos və anarxiyadan, cəmiyyətdə hökm sürən iqtisadi, siyasi və mənəvi-psixoloji gərginliyi aradan qaldırdı. 1994-cü ildə Azərbaycan atəşkəsə nail oldu, Konstitusiyaya, bir sıra digər qanunvericilik aktlarına dəyişikliklər edildi, məhkəmə-hüquq islahatları aparıldı. Müstəqil Azərbaycan dövləti möhkəm əsaslar üzərində müdrik bir dövlət xadiminin siyasəti nəticəsində yeni inkişaf mərhələsinə qədəm qoydu və nəhəng dövlət quruculuğu işlərinə başladı, qarşıya çıxan bütün maneələri aradan qaldırdı, böyük dövlətlərin illərlə əldə edə bilmədiyi nailiyyətlərə qısa bir zamanda nail oldu. Ulu öndər Heydər Əliyev Azərbaycanı dünyaya tanıtdı, Azərbaycanın səsi beynəlxalq kürsülərdən gəldi, Azərbaycan öz sərvətlərinə sahib çıxdı və ölkə tam mənada müstəqil oldu. 1994-cü il sentyabrın 20-də Heydər Əliyevin müəllifi olduğu nəhəng neft müqaviləsi - “Əsrin kontraktı” imzalandı. Bu layihə həm Cənubi Qafqazda təhlükəsizliyin təmin olunmasında, həm də xalqımızın daha firavan yaşamasında mühüm rol oynayır. Azərbaycan dünyanın enerji təhlükəsizliyi sisteminə töhfəsini verdi, kredit alan ölkədən kredit verən bir dövlətə çevrildi.
Bu sözləri AZƏRTAC-a açıqlamasında Milli Məclisin Elm və Təhsil komitəsinin üzvü, professor Aqiyə Naxçıvanlı söyləyib.
Deputat bildirib: “Ümumiyyətlə, Azərbaycan tarixinin Heydər Əliyev dövrü taleyüklü məqamları, dövlətçilik uğrunda gərgin mübarizə ilə öz tutumuna, kütləsinə görə bütöv bir mərhələ, dövrdür. Zaman etibarilə bizlərə çox yaxın olduğu üçün bu gün həmin dövrün tarixi qiymətini, dəyərini bəlkə də düzgün ifadə etmək bir qədər çətindir. Ancaq, heç şübhəsiz, dövlətçilik, idarəetmə, regional siyasət, elm, təhsil, mədəniyyət, idman və s. haqqında yazılacaq nüfuzlu kitablar məhz Heydər Əliyev irsindən qaynaqlanacaq, xalqımızın bu dahi oğlunun fəaliyyəti elmi və elmi-pedaqoji cəhətdən daha mükəmməl öyrəniləcəkdir. Təbii ki, bu kitablarda ümummilli lider Heydər Əliyev bir hakimiyyət ustadı, qətiyyətli dövlət başçısı, müdrik siyasi xadim, məsuliyyətli vətəndaş, cəsur və tədbirli sərkərdə, Vətənini və millətini hədsiz məhəbbətlə sevən bir insan, çətin anlarda hər zaman millətinin yanında olmağı bacaran şəriksiz və alternativsiz lider kimi hərtərəfli öyrənilməlidir. Bütün bunlar gənc nəsil üçün xüsusilə vacibdir”.
Aqiyə Naxçıvanlı diqqətə çatdırıb ki, Azərbaycan xalqının ümummilli lideri, görkəmli dövlət xadimi Heydər Əliyevin zəngin nəzəri irsində və möhtəşəm fəaliyyətində elm və təhsil məsələləri xüsusi yer tutur. Ulu Öndərimiz ölkənin və xalqın taleyində, hərtərəfli tərəqqisində, uğurlar qazanmasında təhsilin xüsusi rolunu, əhəmiyyətini həmişə nəzərə almış, yüksək dəyərləndirmişdir. Dahi rəhbər deyirdi: “Hər bir dövlət əgər istəyirsə ki, öz ölkəsinin inkişafını təmin etsin, öz millətinin elmini, mədəniyyətini dünya standartlarına çatdırsın, o mütləq, hər şeydən çox, təhsilə fikir verməlidir, təhsilin inkişafına səy göstərməlidir, təhsil üçün bütün imkanları yaratmalıdır”.
Ümummilli Lider bu sahədə mövcud olan problemlərin aradan qaldırılması və Azərbaycanda dünyanın inkişaf etmiş ölkələrinin təcrübəsinə uyğun təhsil strategiyasının həyata keçirilməsi məqsədilə ciddi tədbirlər həyata keçirmiş, mühüm tarixi fərman və sərəncamlar imzalamışdır.
Deputat bildirib ki, Heydər Əliyev bütün həyatı boyu öz xeyirxah əməlləri və ədalətli mövqeyi ilə xalqımızın güvənc yerinə çevrilmişdir. İstər müasir tələbata uyğun elmi kadrların hazırlanmasında, istər Azərbaycanın beynəlxalq aləmə və qlobal iqtisadi mühitə sürətlə inteqrasiya etməsində, istərsə də ölkənin sosial-iqtisadi istiqamətlərdə ciddi uğurlar qazanmasında ulu öndər Heydər Əliyevin rəhbərliyi ilə reallaşan tədbirlərin və islahatların rolu danılmazdır.
Uzaqgörən lider Heydər Əliyevin yaratdığı və nəsillər üçün miras qoyduğu ənənələr bu gün də uğurla davam etdirilir. Azərbaycan Prezidenti İlham Əliyevin ölkəmizdə bütün sahələrdə apardığı uğurlu islahatlar, o cümlədən Ulu Öndərin adını daşıyan Heydər Əliyev Fondunun elm, təhsil, mədəniyyət, insanların sağlam təhlükəsizliyi və digər sosial layihələri ilə bağlı gördüyü işlər bu ənənələrin hələ uzun illər yaşayacağına, Azərbaycan xalqının taleyində əhəmiyyətli rol oynayacağına zəmanət verir. Bir sözlə, Ulu Öndər Heydər Əliyevin əsasını qoyduğu dövlətçilik strategiyası uğurla davam etdirilir.
Bölmənin digər xəbərləri
