REGİONLAR
Muxtar respublikada valideynlərini itirmiş və valideyn himayəsindən məhrum olmuş uşaqlar diqqət mərkəzindədir
Naxçıvan, 7 fevral, AZƏRTAC
Dövlət uşaq siyasəti uğurla həyata keçirilir
Naxçıvan Muxtar Respublikasında dövlət uşaq siyasəti uğurla həyata keçirilir. Muxtar respublikada yaşayan bütün kateqoriyadan olan uşaqlara, o cümlədən valideynlərini itirmiş və valideyn himayəsindən məhrum olmuş uşaqların təhsili, milli ruhda təlim-tərbiyəsi, dünyagörüşünün formalaşması və sağlamlıqlarının qorunması diqqət mərkəzində saxlanılır.
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsinin mətbuat xidmətindən AZƏRTAC-ın Naxçıvan bürosuna bildirilib ki, valideyn himayəsindən məhrum olmuş uşaqlar aşkarlanaraq qanunauyğun himayəyə və qəyyumluğa verilir, sosial müdafiələrini gücləndirmək məqsədilə aylıq müavinətlər ödənilir. Belə ki, “Sosial müavinətlərin məbləğinin artırılması haqqında” Azərbaycan Respublikası Prezidentinin 2013-cü il 29 avqust tarixli 973 nömrəli Fərmanında dəyişiklik edilməsi barədə Azərbaycan Respublikası Prezidentinin 2021- ci il 20 dekabr tarixli Fərmanına əsasən valideynlərini itirmiş və valideyn himayəsindən məhrum olmuş uşaqlara ödənilən müavinətlərin məbləği artırılaraq 100 manatdan 120 manatadək, övladlığa uşaq götürənlərə ödənilən aylıq müavinət isə 160 manatdan 200 manatadək artırılıb. Bundan başqa, dövlət, özəl ali və orta ixtisas müəssisələrində təhsil alan valideynlərini itirmiş və valideyn himayəsindən məhrum olmuş uşaqların təhsil haqqı dövlət tərəfindən ödənilir.
Valideyn himayəsindən məhrum olan uşaqlar yaxın qohumlarına himayəyə və qəyyumluğa verilib
Qeyd edək ki, muxtar respublikada valideyn himayəsindən məhrum uşaqlardan 3-ü lisey, 12-si ali, 46-sı ümumtəhsil, 3-ü isə orta ixtisas təhsil müəssisələrində təhsil alırlar. Hazırda muxtar respublikada 97 nəfər valideyn himayəsindən məhrum uşaq vardır ki, onlarında 40-ı valideyn himayəsindən məhrum olmuş, 33-ü hər iki valideynini itirmiş, 24-ü bir valideyni vəfat etmiş digər valideyni isə I, II qrup əlil uşaqlardır.
Bu gün muxtar respublikada valideyn himayəsindən məhrum olmuş uşaqlar Naxçıvan Şəhər Körpələr Evi və Ailələrə Dəstək Mərkəzində və Məhəmməd Füzuli adına Ordubad şəhər internat tam orta məktəbinə deyil, yaxın qohumlarına (əmi, dayı, bibi, xala, baba, nənə) və digər yaxın qohumluq əlaqəsi olan şəxslərə himayəyə və qəyyumluğa verilib. Bu da muxtar respublikada uşaq hüquqlarının, qohumluq əlaqələrinin və ailə dəyərlərinin yüksək səviyyədə qorunduğunun bariz nümunəsidir.
Xüsusi kateqoriyadan olan uşaqlar məktəbli forması və dərs ləvazimatları və qış geyimləri ilə təmin olunurlar
Hər il olduğu kimi 2021-ci ildə də xüsusi kateqoriyadan olan uşaqların məktəbli forması və dərs ləvazimatları, həmçinin qış geyimləri ilə təmin olunması həyata keçirilib. Belə ki, 15 Sentyabr- Bilik Günü ilə əlaqədar aralarında muxtar respublikada yaşayan 20-si tək valideynli, 3-ü valideyn himayəsindən məhrum olmuş uşaq olmaqla, ümumilikdə, 118 uşağa məktəbli forması və dərs ləvazimatları, 19-u təkvalideynli olmaqla, ümumilikdə, 87 xüsusi qayğıya ehtiyacı olan uşağa isə qış geyimi verilib.
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi tərəfindən 2021-ci il ərzində valideynlərini itirmiş və valideyn himayəsindən məhrum olmuş uşaqların asudə vaxtlarının səmərəli keçirilməsi məqsədi ilə onların tarix-memarlıq abidələrinə, muzeylərə, istirahət guşələrinə ekskursiyaları təşkil edilib, uşaqlara teatr tamaşaları, film nümayiş olunub, yay tətili günlərində Ağbulaq İstirahət Mərkəzində digər xüsusi kateqoriyadan olan uşaqlar daxil olmaqla, 38 nəfər hər iki valideynini itirmiş və valideyn himayəsindən məhrum olmuş və tək valideynli uşaqların da iştirakı ilə, ümumilikdə, 49 uşaq “Yay məktəbi”nə cəlb olunub.
Hədiyyələr uşaqlara sevinc bəxş edir
Ötən il iyunun1-də Naxçıvan Muxtar Respublikasının Təhsil Nazirliyinin, Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsi və digər aidiyyəti dövlət qurumlarının təşkilatçılığı ilə Məhəmməd Füzuli adına Ordubad şəhər internat tam orta məktəbində 1 İyun - Uşaqları Beynəlxalq Müdafiə Günü ilə əlaqədar keçirilən tədbirdə 41 hər iki valideynini itirmiş və valideyn himayəsindən məhrum olmuş uşağa hədiyyələr təqdim olunub. Həmin təhsil müəssisəsində 31 Dekabr - Dünya Azərbaycanlılarının Həmrəyliyi Günü və Yeni il bayramı ilə əlaqədar keçirilən tədbirdə aralarında təkvalideynli uşaqlarında olduğu 42 uşağa hədiyyələr təqdim edilib. Ağbulaq İstirahət Mərkəzində hər iki valideyni vəfat etmiş, valideyn himayəsindən məhrum Səmrah Məmmədovun doğum günü ilə bağlı tədbir keçirilib və ona təşkilatçılar tərəfindən hədiyyələr təqdim olunub. Uşaqları Beynəlxalq Müdafiə Günü ilə əlaqədar keçirilən tədbirlərdə 41 hər iki valideynini itirmiş və valideyn himayəsindən məhrum olmuş uşağa hədiyyələr təqdim olunub.
Monitorinqlər davam etdirilir
Valideynlərini itirmiş və valideyn himayəsindən məhrum uşaqların hüquqlarının qorunması məqsədilə yaşadıqları evlərdə mütəmadi olaraq monitorinqlər təşkil olunur, onların yaşayış şəraitləri araşdırılır, problemlərinin həlli istiqamətində konkret işlər görülür. 2021-ci il ərzində Naxçıvan Muxtar Respublikası Nazirlər Kabineti Yanında Yetkinlik Yaşına Çatmayanların İşləri və Hüquqlarının Müdafiəsi üzrə Komissiyanın ekspert qrupu, həmçinin muxtar respublikanın şəhər və rayonlarının icra hakimiyyəti orqanlarında fəaliyyət göstərən müvafiq komissiyaların üzvləri tərəfindən Naxçıvan şəhəri, Şərur, Ordubad, Culfa rayonları üzrə 16 hər iki valideynini itirmiş, 8 valideyn himayəsindən məhrum uşaq olmaqla, 24 uşağın yaşadığı evdə monitorinq keçirilib. Monitorinq zamanı uşaqların təlim-tərbiyələri, yaşayış və sosial şəraitləri, sağlamlıqları və uşaq hüquqlarını əhatə edən digər sahələr yoxlanılıb, qəyyum və himayədarlar, eləcə də uşaqlarla söhbətlər aparılıb, aşkar olunan problemlər həll olunaraq aradan qaldırılıb.
Müvafiq kateqoriyadan olan uşaqlarla bağlı məlumat bazası yaradılıb
Naxçıvan Muxtar Respublikasının Ailə, Qadın və Uşaq Problemləri üzrə Dövlət Komitəsində müvafiq kateqoriyadan olan uşaqlarla bağlı məlumat bazası yaradılıb. 2021-ci il ərzində Naxçıvan şəhəri üzrə 7, Şərur rayonu üzrə 6, Babək rayonu üzrə 2, Ordubad rayonu üzrə 1 uşaq olmaqla, qəyyumluq və himayəyə verilmiş valideyn himayəsindən məhrum 16 uşağın qeydiyyatı komitənin müvafiq kitabında aparılıb.
Sevindirici haldır ki, bu gün muxtar respublikada fəaliyyət göstərən Naxçıvan Şəhər Körpələr Evi və Ailələrə Dəstək Mərkəzində və M.Füzuli adına Ordubad şəhər internat tam orta məktəbində bir nəfər də olsun valideyn himayəsindən məhrum uşaq yoxdur və ya təhsil almır.
Tam əminliklə demək olar ki, valideynlərini itirmiş və valideyn himayəsindən məhrum olan uşaqların hər biri yaxın qohumlarının qəyyumluq və himayəsində yaşayır, sağlam böyüyür, milli dəyərlər əsasında tərbiyə olunur, intellektual səviyyələri inkişaf edir və ən əsası da ali və orta ixtisas müəssisələrində təhsil alaraq layiqli vətəndaş kimi yetişirlər.