Muzeydə “20 Yanvar şəhidləri” kataloqunun təqdimatı keçirilib
Bakı, 19 yanvar, AZƏRTAC
Azərbaycan Milli Elmlər Akademiyasının Milli Azərbaycan Tarixi Muzeyində bu elm müəssisəsi tərəfindən hazırlanan və nəşr etdirilən “20 Yanvar şəhidləri” kataloqunun təqdimatı olub.
AZƏRTAC xəbər verir ki, təqdimat mərasimində muzeyin direktoru, akademik Nailə Vəlixanlı 1990-cı il yanvarın 19-dan 20-nə keçən gecə keçmiş sovet ordusunun Bakıda və Azərbaycanın digər şəhər və rayonlarında törətdiyi qanlı qırğınlardan danışıb, o müdhiş gecədə günahsız insanların qanlarının axıdıldığını bildirib.
Akademik N.Vəlixanlı 20 Yanvar hadisələri ilə əlaqədar ümummilli lider Heydər Əliyevin Azərbaycanın Moskvadakı daimi nümayəndəliyinə gələrək mətbuat konfransında bəyanatla çıxış etdiyini və günahsız insanlara qarşı törədilən bu amansız qətliama qarşı kəskin etirazını bildirdiyini, cinayətkarların cəzalandırılmasını qətiyyətlə tələb etdiyini diqqətə çatdırıb.
20 Yanvar faciəsinin səbəbləri barədə məlumat verən muzeyin direktoru bu hadisə zamanı qəhrəman Vətən övladlarının ölkəmizin azadlığı və müstəqilliyi yolunda canlarından keçərək şəhidlik zirvəsinə ucaldığını vurğulayıb.
Qeyd olunub ki, 20 Yanvar faciəsi yalnız Azərbaycan xalqına qarşı deyil, insanlığa, humanizmə qarşı törədilən cinayətdir.
Tədbirdə təqdim edilən “20 Yanvar şəhidləri” kataloqu haqqında məlumat verilib. Qeyd olunub ki, muzey 20 Yanvar faciəsi ilə bağlı sənəd, foto və əşyaların toplanması işini davam etdirir. Bu faciə ilə bağlı 300-dən artıq eksponat muzeyin müvafiq fondlarında qorunur.
Kataloqda Qara Yanvara dair müxtəlif materiallar - otuz yeddi şəhidin şəxsi əşyaları, çoxlu fotoşəkillər, qəzetlər, rəsm əsərləri və s. əksini tapıb.
Yeni Azərbaycan Partiyası Səbail rayon təşkilatının aparat rəhbəri Zəfər Bayramov bildirib ki, 20 Yanvar tariximizin qanlı səhifəsinə çevrilsə də, həm də xalqımızın qəhrəmanlıq səhifəsidir. 20 Yanvar xalqımızın qəhrəmanlıq ənənələrinə sadiqliyini, Vətənin azadlığı və müstəqilliyi uğrunda canından keçməyə hazır olduğunu bir daha sübut etdi.
Diqqətə çatdırılıb ki, ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra 20 Yanvar faciəsinə siyasi-hüquqi qiymət verilib.
“Qadın və İnkişaf” Mərkəzinin vitse-prezidenti, 20 Yanvar şəhidi Cəbrayıl Xanməmmədovun həyat yoldaşı Şövkət Xanməmmədova 20 Yanvar qırğınının dəhşətlərindən bəhs edib, şəhidlərin xatirəsinin daim əziz tutulduğunu bildirib.
O, eyni zamanda, “20 Yanvar şəhidləri” kataloqunun əhəmiyyətini vurğulayıb.
Bölmənin digər xəbərləri
