NARKOMANLIQLA MÜBARİZƏYƏ DAİR BİRGƏ TƏDBİRLƏR MÜZAKİRƏ EDİLMİŞDİR
Mayın 20-də səhiyyənin islahatı üzrə tədris mərkəzində “Narkomanlıqla mübarizə üzrə milli strategiya” mövzusunda dəyirmi masa keçirilmişdir.
Səhiyyə naziri Əli İnsanov tədbirdə çıxış edərək bildirdi ki, respublikada təxminən 11 min narkoman qeydə alınmışdır. Ötən il onların sayı min nəfər artmışdır və bu meyl təşviş doğurur. Son illər Azərbaycanın bir çox bölgələrində narkoloji mərkəzlər açılmışdır.
Dünya Səhiyyə Təşkilatının \DST\ nümayəndəsi Almaz İmambayev bildirdi ki, onun təmsil etdiyi təşkilat bu problemlə mübarizə üçün Azərbaycana 700 min ABŞ dolları ayırmışdır. MDB ölkələrindəki vəziyyət təhlükəli hal alır. DST-nin məlumatına görə, Avropa ölkələrində narkomanlığın səviyyəsi aşağı düşdüyü halda, keçmiş sovet respublikalarında bu təhlükəli vərdişə meyl göstərənlərin sayı ildən-ilə artır.
Tədbir iştirakçıları çıxışlarında vurğuladılar ki, bu bəla ilə mübarizə prosesinə təkcə həkim və mütəxəssislər deyil, hüquq mühafizə orqanlarının əməkdaşları, kütləvi informasiya vasitələrinin işçiləri, qeyri-hökumət təşkilatları da qoşulmalıdırlar.
Bölmənin digər xəbərləri
