Naxçıvan Azərbaycanın gələcək inkişaf xəritəsində xüsusi yer tutur ŞƏRH
Bakı, 17 avqust, AZƏRTAC
Prezident İlham Əliyevin Naxçıvana səfəri və Azərbaycan Televiziyasına verdiyi müsahibə Naxçıvanın gələcək inkişaf strategiyasına dair mühüm mesajlarla yadda qaldı. Səfər çərçivəsində təqdim olunan layihələr, verilən tapşırıqlar və müəyyənləşdirilən yeni hədəflər göstərir ki, Naxçıvan qarşıdakı illərdə Azərbaycanın sosial-iqtisadi, enerji, nəqliyyat və təhlükəsizlik siyasətində daha mühüm mövqeyə malik olacaq.
Bu fikirləri AZƏRTAC-a açıqlamasında Milli Məclisin deputatı Fatma Yıldırım deyib.
Onun sözlərinə görə, Naxçıvanın təhlükəsizliyinin və müdafiə potensialının gücləndirilməsi dövlət siyasətinin əsas istiqamətlərindəndir. Əlahiddə Ordunun müasir hərbi texnika və yeni komando qüvvələri ilə daha da gücləndirilməsi Azərbaycanın milli təhlükəsizliyinə və dövlət suverenliyinə verilən əhəmiyyətin göstəricisidir.
“Səfərin mühüm nəticələrindən biri Naxçıvan Sənaye Parkının təməlinin qoyulması oldu. Parkda yeni istehsal sahələrinin yaradılması, investisiyaların cəlb edilməsi və əlavə iş yerlərinin açılması Naxçıvan iqtisadiyyatının şaxələndirilməsinə və sənaye potensialının genişləndirilməsinə mühüm imkanlar yaradacaq. İqtisadi inkişafın davamlılığının təmin edilməsində enerji infrastrukturu da mühüm rol oynayır. Bu baxımdan 300 meqavat gücündə istilik elektrik stansiyasının inşası Naxçıvanın enerji təhlükəsizliyinin möhkəmləndirilməsi ilə yanaşı, gələcəkdə əlavə enerji istehsalı və ixracı imkanlarının formalaşdırılmasına xidmət edəcək. Bununla yanaşı, Günəş və su elektrik stansiyalarının, eləcə də enerji saxlanc sistemlərinin yaradılması bərpaolunan enerji potensialından daha səmərəli istifadəyə şərait yaradacaq”, - deyə deputat əlavə edib.
F.Yıldırım bildirib ki, Naxçıvanın Azərbaycanın əsas hissəsi ilə nəqliyyat bağlantısının bərpası regionun gələcək inkişafı baxımından xüsusi əhəmiyyət daşıyır. Bu istiqamətdə Horadiz–Ağbənd avtomobil yolunun tamamlanması, dəmir yolu layihələrinin sürətlə həyata keçirilməsi və Naxçıvan dəmir yolunun yükdaşıma imkanlarının artırılması ölkəmizin ardıcıl siyasətinin mühüm tərkib hissəsidir. Bu baxımdan Zəngəzur dəhlizi də yalnız nəqliyyat marşrutu kimi deyil, regionun iqtisadi və kommunikasiya imkanlarını genişləndirəcək strateji bağlantı layihəsi kimi qiymətləndirilməlidir. Dəhliz çərçivəsində dəmir yolu və avtomobil yolları ilə yanaşı, enerji və fiber-optik xətlərin yaradılması nəzərdə tutulur ki, bu da onun regional nəqliyyat əlaqələri ilə yanaşı, enerji və kommunikasiya infrastrukturu baxımından da əhəmiyyətini artırır. 2025-ci il avqustun 8-də Vaşinqtonda əldə olunmuş razılaşmalar isə bu istiqamətdə mühüm tarixi mərhələ kimi dəyərləndirilə bilər.
“Təbii ki, Naxçıvanın inkişafı yalnız iqtisadi və infrastruktur layihələri ilə məhdudlaşmır. Sosial obyektlərin yaradılması, yeni yolların salınması, ictimai nəqliyyatın yenilənməsi, DOST və “ASAN xidmət” imkanlarının genişləndirilməsi, uşaq bağçalarının tikintisi və digər layihələr insanların rifahının yaxşılaşdırılmasına xidmət edir. Kənd təsərrüfatı və su təminatı ilə bağlı layihələr regionun iqtisadi potensialından daha səmərəli istifadəyə imkan verəcək, turizm infrastrukturunun inkişafı isə Naxçıvanın zəngin tarixi və mədəni irsinin daha geniş şəkildə tanıdılmasına şərait yaradacaq. Bu baxımdan tarixi-mədəni irsin qorunması xüsusi əhəmiyyət daşıyır. Möminə xatun türbəsinin bərpası, Əcəmi Naxçıvaninin irsinin yaşadılması və digər tarixi abidələrin mühafizəsi Naxçıvanın zəngin keçmişinin gələcək nəsillərə çatdırılması baxımından mühüm addımlardır. Birinci xanım Mehriban Əliyevanın milli-mədəni irsin qorunması istiqamətində həyata keçirdiyi layihələr də Azərbaycanın tarixə və mədəniyyətə yüksək ehtiramının bariz nümunəsidir. Beləliklə, Naxçıvanda həyata keçirilən sosial, iqtisadi və mədəni layihələr regionun hərtərəfli inkişafını təmin etməklə yanaşı, onun özünəməxsus tarixi və mədəni simasının qorunmasına da xidmət edir”, - deyə deputat vurğulayıb.
Onun fikrincə, Prezident İlham Əliyevin Naxçıvan, Qarabağ və Şərqi Zəngəzurun vahid inkişaf konsepsiyası əsasında inkişaf etdirilməsi ilə bağlı yanaşması ölkənin müxtəlif bölgələrinin potensialının bir-biri ilə əlaqələndirilməsi baxımından strateji əhəmiyyət daşıyır. Bu yanaşma həmin ərazilər arasında iqtisadi, enerji və nəqliyyat əlaqələrinin gücləndirilməsinə, vahid inkişaf məkanının formalaşdırılmasına imkan yaradır. Bu çərçivədə Naxçıvan qarşıdakı illərdə sənaye, enerji, logistika, kənd təsərrüfatı və turizm sahələrində mövcud potensialını daha geniş şəkildə reallaşdıra bilər. Bunun üçün həyata keçirilən layihələr, ardıcıl investisiya siyasəti və dövlətin strateji yanaşması Naxçıvanın yeni inkişaf mərhələsinin əsasını formalaşdırır. Prezident İlham Əliyevin səfəri də bir daha göstərdi ki, Naxçıvan Azərbaycanın gələcək inkişaf xəritəsində xüsusi yer tutur.
Bölmənin digər xəbərləri
