NAXÇIVAN MUXTAR RESPUBLİKASINDA ƏHALİNİN ƏRZAQ TƏHLÜKƏSİZLİYİNİN TƏMİN OLUNMASI ÜÇÜN TƏDBİRLƏR GÖRÜLÜR
AZƏRTAC xəbər verir ki, Naxçıvan Muxtar Respublikasında əhalinin taxıla ehtiyacının ödənilməsi, ərzaq təhlükəsizliyinin təmin olunması üçün bütün imkanlar vardır.
Bu mövsüm bölgədə taxıl sahəsi təxminən 10 min hektar artırılaraq 33 min hektara çatdırılmışdır. Sərt hava şəraitini nəzərə alan fermerlər payızlıq taxıl əkininə üstünlük vermişlər. Payızda əkilmiş 23 min 988 hektar taxıl sahəsində zəminin hündürlüyü 30-35 santimetrə çatır. Bol məhsulun əldə olunması üçün zəruri aqrotexniki tədbirlər davam etdirilir. Sahələr alaq otundan təmizlənir, suvarılır, ziyanvericilərə qarşı kimyəvi yolla mübarizə aparılır. Eyni zamanda, daha 10 min hektar sahədə yazlıq taxıl əkilir.
Fermerlərin taxılçılığa marağının artması, prezident sərəncamına uyğun olaraq, onlara yanacaq və gübrəyə görə maliyyə yardımı edilməsi ilə izah olunur. Ötən il Muxtar Respublikada 13 mindən çox istehsalçıya 1 milyon 691 min manat dövlət yardımı ödənmişdir. Payızlıq buğda əkini üzrə 4 min 660 istehsalçıya 1 milyon manatdan artıq yardımın verilməsi davam etdirilir. Eyni zamanda taxılçılıqla məşğul olan istehsalçılara güzəştli kreditlər verilir.
Görülən tədbirlər əhalinin ərzaq məhsulları ilə etibarlı təminatına xidmət edir. Əkin dövriyyəsində olan torpaqlardan tam və düzgün istifadə ediləcəyi təqdirdə Muxtar Respublika ərzaq məhsullarına, xüsusən də taxıla ehtiyacını özü ödəyə biləcəkdir.
Bölmənin digər xəbərləri
