Nazir müavini: Növbəti on il ərzində böyük sərmayə qoyuluşunu planlaşdırırıq
Bakı, 30 noyabr, AZƏRTAC
Sahibkarlığın inkişafı iş yerlərinin açılması sərmayə qoyulmasının asanlaşdırılması üçün imkanlar yaradır.
AZƏRTAC xəbər verir ki, bu barədə iqtisadiyyat nazirinin müavini Elnur Əliyev “InMerge Innovation Summit”də çıxışı zamanı deyib.
O bildirib ki, növbəti on il ərzində böyük sərmayə qoyuluşunu planlaşdırırıq: “Bu, bazarda innovasiyalara daha geniş imkan yaradacaq, ÜDM-ə öz təsirini göstərəcək. Əsas fokusumuz yeni bizneslərin yaradılması olacaq. Biz rəqəmsal savadlılığın artırılmasına nail olacağıq, əməkdaşlıqlarımız əsasən rəqəmsal ticarətin yaradılması istiqamətindədir. Süni intellektin imkanlarından istifadə edərək investisiya qoyuluşunu daha effektiv istifadə etməyə çalışacağıq".
Nazir müavini onu da əlavə edib ki, İqtisadiyyat Nazirliyi növbəti bir neçə ildə effektiv tədbirlərin görülməsini planlaşdırır.
“Bunlardan birincisi rəqəmsal bacarıqların yaradılmasıdır. Rəqəmsal əkizlər texnologiyalarına yaxından nəzarət edirik. Bu sahəni inkişaf etdirməklə öz dövlətimizə dəyər gətirmiş olacağıq. İqtisadiyyatların dayanıqlılığının təmin olunması üçün innovasiyaların gücündən daha geniş istifadə edəcəyik ki, cəmiyyətin rifahını daha da yaxşılaşdıraq”, - deyə nazir müavini əlavə edib.
Bölmənin digər xəbərləri
