NAZİRLƏR KABİNETİNDƏ GÖRÜŞ
İyunun 26-da Azərbaycanın Baş naziri Artur Rasizadə Rusiya Federasiyası Dağıstan Respublikasının Prezidenti Muxu Əliyevin başçılıq etdiyi nümayəndə heyəti ilə görüşmüşdür. Baş nazir Artur Rasizadə qeyd etmişdir ki, Azərbaycan-Dağıstan münasibətləri kifayət qədər yüksək səviyyədədir. İqtisadi əlaqələrin daha da genişləndirilməsinin zəruri olduğunu bildirən Baş nazir demişdir ki, Azərbaycan əlverişli perspektivlərə malik olan qarşılıqlı faydalı əməkdaşlığın dərinləşdirilməsinə yönəlmiş layihələri dəstəkləyəcəkdir. Baş nazir Azərbaycan-Rusiya münasibətlərinin yüksək səviyyədə olduğunu qeyd edərək bildirmişdir ki, Azərbaycan Rusiyanın regionları ilə birbaşa əlaqələrin də inkişafına böyük əhəmiyyət verir. A.Rasizadə buna misal olaraq, bu yaxınlarda Tatarıstana səfərini xatırlamış, bildirmişdir ki, RF-nin bu subyektinin rəhbərləri ilə səmərəli görüşlər keçirilmiş, danışıqlar aparılmışdır.
Azərbaycan Prezidenti İlham Əliyevin dəvəti ilə Rusiya dövlətinin başçısı Dmitri Medvedev iyulun əvvəllərində Bakıya rəsmi səfər edəcəkdir. Bu da Azərbaycan-Rusiya münasibətlərinin yüksək səviyyədə olmasına dəlalət edir.
Azərbaycan hökumətinin başçısı ölkəmizin iqtisadi vəziyyəti barədə söhbət açaraq bildirmişdir ki, yanacaq-energetika sahəsində həyata keçirilən layihələr iqtisadiyyatın başqa sahələrində əhəmiyyətli proqramların reallaşdırılması, infrastrukturun inkişafı üçün yaxşı perspektivlər açır. Məsələn, Rusiya Federasiyasının sərhədinə qədər avtomobil magistralının tikintisi başlanmışdır. Bu iş ilyarımdan sonra başa çatacaqdır. Lap yaxın vaxtlarda isə İran və Gürcüstan sərhədlərinə qədər müasir avtomobil yolları çəkiləcəkdir. Şimal-Cənub nəqliyyat layihəsinin həyata keçirilməsi beynəlxalq iqtisadi əlaqələrin inkişafı üçün yaxşı imkanlar açacaqdır. Onu da nəzərə almaq lazımdır ki, Azərbaycan Bakı-Tbilisi-Qars dəmir yolu layihəsini həyata keçirir. Beləliklə, ölkəmiz Avropa ilə dəmir yolu xətləri vasitəsilə bağlanacaqdır.
Hökumətimizin başçısı Ermənistan-Azərbaycan, Dağlıq Qarabağ münaqişəsi, onun dinc yolla həll edilməsi üçün ölkəmizin rəhbərliyi tərəfindən görülən tədbirlər barədə nümayəndə heyətinin üzvlərinə ətraflı məlumat vermişdir. Artur Rasizadə bildirmişdir ki, Ermənistanın təcavüzkar separatçılıq və işğalçılıq siyasəti bütün region üçün ağır nəticələrə gətirib çıxarır.
Prezident Muxu Əliyev Rusiya Federasiyasının Qafqazda aparıcı subyektlərindən biri olan Dağıstan ilə Azərbaycan arasında əlaqələrin hərtərəfli inkişaf etdirilməsinin vacibliyini vurğulayaraq qeyd etmişdir ki, bizim qarşılıqlı münasibətlər çoxəsrlik tarixə malikdir və nümunə sayıla bilər. O, iqtisadi münasibətlərin inkişafından bəhs edərək vurğulamışdır ki, Azərbaycanın müxtəlif sahələrə sərmayə qoymaq imkanı Dağıstanı cəlb edir.
Qonaq Azərbaycanın nəinki regionda lider dövlətə çevrilməsini, hətta iqtisadi artım sürətinə görə dünyada birinci yeri tutduğunu qeyd edərək vurğulamışdır ki, bütün bu nailiyyətlər Azərbaycanın ümummilli lideri Heydər Əliyevin adı ilə bağlıdır. Dağıstan xalqı Azərbaycanı parçalanmaq təhlükəsindən xilas etmiş Heydər Əliyevin şəxsiyyətinə həmişə dərin hörmət bəsləmişdir.
######
Bölmənin digər xəbərləri
