NAZİRLƏR KOMİTƏSİNİN SƏDRİ HƏMKARLARINI GÜRCÜSTANDAKI MÜNAQİŞƏ İLƏ BAĞLI QEYRİ-RƏSMİ YIĞINCAĞA DƏVƏT ETMİŞDİR
AZƏRTAC-ın xüsusi müxbiri Avropa Şurasının mətbuat xidmətinin məlumatına istinadla xəbər verir ki, sentyabrın 3-də Avropa Şurası Nazirlər Komitəsinin daimi nümayəndələri səviyyəsində Gürcüstan ətrafında yaranmış vəziyyəti təhlil etmək məqsədi ilə yığıncağı keçirilmişdir.
Yığıncaqda Gürcüstan və Rusiya tərəflərinin bəyanatları, yaranmış vəziyyətlə bağlı Nazirlər Komitəsinin sədri, İsveçin xarici işlər naziri Karl Bildtin və Avropa Şurasının müxtəlif orqanlarının - Avropa Şurası Parlament Assambleyasının, İnsan Hüquqları Komissarının və İnsan Hüquqları üzrə Məhkəmənin qəbul olunmuş və nəzərdə tutulan tədbirlər barədə məlumatları dinlənilmişdir.
Yığıncaqda Gürcüstan ətrafındakı hadisələrə Avropa Şurasının dəyərləri əsasında qiymət vermək üçün yaxın vaxtlarda Nazirlər Komitəsinin Avropa Şurasına üzv dövlətlərin xarici işlər nazirlərinin iştirakı ilə qeyri-rəsmi yığıncağının keçiriləcəyi daimi nümayəndələrin nəzərinə çatdırılmışdır.
Bölmənin digər xəbərləri
