İQTİSADİYYAT
Neftin qiyməti aprelin sonundan bəri ilk dəfə həftəni itkilərlə tamamlamağa yönəlib
Bakı, 12 iyun, AZƏRTAC
Xam neft qiymətləri aprel ayının sonundan bu vaxta kimi ilk dəfə həftəni itkilərlə tamamlamağa yönəlib.
AZƏRTAC xəbər verir ki, dünyada koronavirusa yoluxma hallarının sayının yüksəlməsi, ABŞ-ın Federal Ehtiyatlar Sisteminin (FED) iqtisadi xəbərdarlıqları, Birləşmiş Ştatlarda xam neft ehtiyatlarının rekord həcmdə çoxalması və qlobal səviyyədə neft ehtiyatlarının yenidən artacağına dair narahatlıqlar həftə ərzində “qara qızıl”ın qiymətinə mənfi təsir göstərib.
Bu proseslər fonunda neftin qiyməti “OPEC+” koalisiyasının hasilat məhdudiyyətlərinin müddətini uzatmasını o qədər də diqqətə almadı. Belə ki, həftənin əvvəlində bir barreli 43 dollardan baha satılan “Brent” markalı neftin qiyməti hazırda 38 dollara düşüb.
Qeyd edək ki, “Brent” markalı neftin bir barreli Londonun ICE birjasında 38,22 dollara, “Light” markalı neftin bir barreli isə Nyu-Yorkun NYMEX birjasında 36,11 dollara satılır.