NƏQLİYYAT NAZİRLİYİNDƏ ASİYA İNKİŞAF BANKININ NÜMAYƏNDƏLƏRİ İLƏ GÖRÜŞ KEÇİRİLMİŞDİR
Nəqliyyat Nazirliyinin mətbuat xidmətindən AZƏRTAC-a bildirmişlər ki, nazirlikdə Asiya İnkişaf Bankının (AİB) təmsilçiləri ilə kredit sazişinin layihəsi müzakirə olunmuşdur.
Nəqliyyat nazirinin müavini Musa Pənahov AİB ilə Azərbaycan arasında uğurlu əməkdaşlıqdan danışmış, 2007-ci il avqustun 8-də imzalanmış Yol Şəbəkəsinin İnkişaf Proqramı üzrə çoxtranşlı kredit mexanizmi üçün çərçivə sazişi barədə məlumat vermişdir.
Çərçivə sazişinin müddəalarına uyğun olaraq, Azərbaycan hökuməti AİB-in adi kapital ehtiyatlarından 55,4 milyon ABŞ dolları məbləğində kredit formasında tranş hazırlanması üçün Banka müraciət etmişdir.
Layihə Bakıdan Gürcüstan sərhədinədək olan Şərq-Qərb magistralının bir hissəsini - 39 kilometr uzunluğunda ikizolaqlı Gəncə dairəvi avtomobil yolunun yenidən qurulmasını nəzərdə tutur. Layihənin ümumi dəyəri 73,9 milyon ABŞ dolları məbləğində hesablanmışdır və bunun 18,5 milyon dolları Azərbaycan hökumətinin payına düşür.
Görüşün sonunda kredit sazişinin layihəsi üzrə aparılan danışıqların nəticəsi olaraq müvafiq protokol imzalanmışdır.
Bölmənin digər xəbərləri
