NİZAMİ RAYONUNDA 20 YANVAR FACİƏSİNİN İLDÖNÜMÜ İLƏ BAĞLI TƏDBİRLƏR KEÇİRİLİR
Bakı, 18 yanvar (AZƏRTAC). Bu günlər ölkəmizin hər yerində olduğu kimi, paytaxtımızın Nizami rayonunun idarə və təşkilatlarında, təhsil müəssisələrində də 20 Yanvar faciəsinin 20-ci ildönümünə həsr olunmuş müxtəlif tədbirlər keçirilir.
Yanvarın 18-də Nizami Rayon İcra Hakimiyyətinin təşəbbüsü ilə rayonda 20 Yanvar şəhidlərinin ailələri və əlilləri ilə keçirilən görüşdə əvvəlcə Vətənimizin azadlığı və ərazi bütövlüyü uğrunda həlak olanların xatirəsi bir dəqiqəlik sükutla yad edilmişdir.
Sonra görüşdə çıxış edənlər qanlı faciənin yaranma səbəblərindən, həmin dəhşətli hadisəni törədən keçmiş imperiya rəhbərlərinin məkrli niyyətlərindən danışmışlar. Bildirilmişdir ki, bu dəhşətli qırğına ilk dəfə siyasi-hüquqi qiyməti ümummilli liderimiz, müasir Azərbaycan dövlətinin qurucusu Heydər Əliyev vermişdir. Bakıda və Azərbaycanın bir neçə rayonunda törədilən qanlı qırğına ilk dəfə məhz ulu öndərimiz kəskin etirazını bildirmiş, həyatını təhlükəyə ataraq keçmiş SSRİ-nin paytaxtında Azərbaycan nümayəndəliyinə gələrək faciənin təşkilatçılarına qəti etirazını bildirmişdir. Xalqın təkidli tələbi ilə hakimiyyətə qayıdan ümummilli liderimiz ölkəmizi məhv olmaq təhlükəsindən xilas etmiş, ona göstərilən yüksək inam və etimadı layiqincə doğrultmuşdur. Qısa müddətdə ulu öndər Heydər Əliyev Azərbaycanı tənəzzül girdabından qurtararaq, demokratik inkişaf yoluna çıxarmışdır. Bu gün ümummilli liderimizin siyasi xəttinin layiqli davamçısı Prezident İlham Əliyevin rəhbərliyi altında Azərbaycan öz böyük öndərinin müəyyən etdiyi yolla inamla irəliləyir.
Rayonda yaşayan 20 Yanvar əlillərinə və şəhid ailələrinə daim diqqət və qayğı göstərildiyi vurğulanmış və həmin ənənənin bundan sonra da davam etdiriləcəyi diqqətə çatdırılmışdır.
Şəhid anaları, o müdhiş gecənin şahidləri çıxış edərək faciə qurbanlarının ailə üzvlərinə, sağlamlığını itirmiş insanlara daim diqqət və qayğı göstərdiyinə görə Prezident İlham Əliyevə minnətdarlıqlarını bildirmişlər.
Rayon uşaq və yeniyetmələrin yaradıcılıq mərkəzinin üzvləri Qanlı Yanvar şəhidlərinin xatirəsinə həsr olunmuş ədəbi-bədii kompozisiya göstərmişlər. Gənc rəssamların 20 Yanvar faciəsinə həsr olunmuş əsərlərindən ibarət sərgi də tədbir iştirakçıları tərəfindən maraqla qarşılanmışdır.
Sonda 20 Yanvar şəhidlərinin ailələrinə və əlillərə maddi yardım edilmişdir.
######
Bölmənin digər xəbərləri
