NORVEÇDƏ AZƏRBAYCAN DİASPORUNUN NÜMAYƏNDƏLƏRİ İLƏ GÖRÜŞ
Görüşə toplaşan soydaşlarımız Heydər Əliyevi hərarətlə salamladılar. Çıxış edənlər dedilər ki, xalqımızın ləyaqətli oğlu və müstəqil vətənimizin Prezidenti ilə görüşməyimiz bütün Azərbaycan xalqı ilə görüşmək qədər fərəhlidir. Biz uzaqda yaşasaq da, xalqlarımızı, vətənimizi heç vaxt unutmuruq. Azərbaycanda baş verən hadisələri ürək çırpıntısı ilə izləyirik, xalqımızın sevincinə sevinir, kədərinə şərik oluruq. Xalqımızın azadlıq və müstəqillik uğrunda apardığı mübarizə onu təkcə keçmiş sovet respublikalarında deyil, Qərb ölkələrində də qəhrəman və qorxmaz bir millət kimi tanıtdı. Biz isə burada hər bir imkandan istifadə edib Azərbaycan xalqının əsarətə qarşı apardığı mübarizəni və 1990-cı ilin yanvarında sovet qoşunlarının günahsız adamları qan içində boğmasını Norveç ictimaiyyətinə çatdırdıq. Qeyd olundu ki, Ermənistanın Azərbaycana qarşı hərbi təcavüzünə, erməni millətçilərinin törətdikləri vəhşiliklərə, habelə bəzi xarici dövlətlərin Ermənistanı dəstəkləməsinə etiraz əlaməti olaraq Norveçdə nümayişlər də keçirilmişdir.
Çıxış edənlər əmin olduqlarını bildirdilər ki, şanlı və şöhrətli tarixi olan Azərbaycan xalqı özünün dəyərli oğlunun - respublika Prezidenti Heydər Əliyevin rəhbərliyi ilə düşmənlərə qalib gələcəkdir. Xaricdəki soydaşlar da həmişə xalqımızla çiyin-çiyinə olacaqlar.
Prezident Heydər Əliyevə məlumat verildi ki, Norveçdə min beş yüz azərbaycanlı yaşayır. Bu görüşün təşkilatçısı isə respublikamızda yaradılmış Azərbaycan-Norveç cəmiyyəti idi. Qeyd olundu ki, cəmiyyət Azərbaycan-Norveç əlaqələrinə dair filmin çəkilişinə başlayır. Filmin əsasını Prezident Heydər Əliyevin bu ölkəyə səfəri, eyni zamanda skandinaviyalıların Azərbaycanla qohumluğu barədə məşhur səyyah Tur Heyerdalın nəzəriyyəsi, habelə Norveçdə yaşayan azərbaycanlılar haqqında süjetlər təşkil edəcəkdir.
Prezident Heydər Əliyev görüşə toplaşanlar qarşısında çıxış etdi.
Prezident Heydər Əliyev sualları cavablandırdı.
Görüş səmimilik şəraitində keçdi.
Bölmənin digər xəbərləri
