Norveçli-azərbaycanlı musiqiçi Mari Sahba yeni sinqlını təqdim edib
Stokholm, 25 sentyabr, AZƏRTAC
Norveçli-azərbaycanlı musiqiçi Mari Sahbanın 2024-cü ildə buraxılan “A Billion Years Too Soon” adlı debüt albomu musiqi tənqidçiləri tərəfindən geniş rəğbətlə qarşılanmışdı.
AZƏRTAC xəbər verir ki, musiqiçi növbəti albomu – ilk sinqlı olan “Nothing Lasts Forever” kompozisiyası ilə öz yaradıcılığında yeni səhifə açır və ümidvardır ki, onu yaxın gələcəkdə Azərbaycanda da təqdim edəcək. Mari Sahba Bakıda səhnəyə çıxmağı, nəhayət ümdə arzusunu həyata keçirməyi - əcdadlarının vətənini ziyarət etməyi həmişə arzulayıb.
“Nothing Lasts Forever” mahnısı Sahbanın 2025-ci ildə anasını itirməsindən, habelə atasının vəfatından bir neçə il sonra bəstələnib. Ağrı-acı və məyusluq, amma eyni zamanda güclü həyat eşqi ilə ərsəyə gələn bu kompozisiya onun yaşadığı kədər hissini əks etdirir.
Musiqiçi deyir: “Xəstəlik və ölümün sanki sonsuz bir konveyerdə hərəkəti fonunda daim güclü olmaq məcburiyyətində qalmaqdan çox yorulmuşam. “Nothing Lasts Forever” güclü ağrı və ədalətsizliyə qalib gələrək bütün dünyaya qarşı üsyan etmək istədiyim bir hissdən yaranıb. Eyni zamanda, indi həmişəkindən daha çox özümü canlı hiss etmək və hələ gənc ikən həyatdan zövq almaq istəyirəm”.
“Nothing Lasts Forever” sinqlının təməlində də məhz bu təzad dayanır; daxili üzgünlük və yaşamaq eşqi, kədər və taleyi ilə barışmamaq. Mahnının elektron səslənməsi tanınmış norveçli-iranlı bəstəkar və musiqiçi Cavid Əfsəri Radın ifa etdiyi səntur alətinin səsi ilə vəhdət təşkil edir. Sahba artıq uzun illərdir ki, onun yaradıcılığına heyranlığını bildirir.
Mahnının müəllifi olan Sahba, həmçinin özünün prodüseri, çoxdankı musiqi yoldaşı Martin Vinye ilə çıxış edib. Kompozisiya Matias Tellez tərəfindən miks edilib, yekun səsləndirməni isə Brayan Li həyata keçirib.
Mari Sahba alternativ pop musiqisinin Azərbaycan musiqi ənənələri ilə sintezindən ibarət olan özünəməxsus təranələri səsləndirməkdə davam edir. Qərb pop musiqisini Şərq musiqi ənənələri ilə birləşdirən musiqiçi həm Norveçdə, həm də beynəlxalq səviyyədə öz adından bəhs etdirməyə nail olub. Onun debüt albomu olan “A Billion Years Too Soon” 2024-cü ilin Norveçdə ən yaxşılardan biri seçilib. İfaçının mahnıları həm Norveçdə, həm də beynəlxalq səviyyədə radiolarda səsləndirilib, onun musiqisindən isə “Netflix”, Apple TV+, “HBO Max” və WWF-nin layihələrində və kampaniyalarında istifadə olunub. Davamlı qastrol səfərləri və mediada işıqlandırılması sayəsində Sahba, həmçinin Türkiyə və Azərbaycanda da getdikcə artan auditoriyaya malik olur.
Qeyd edək ki, Mari Sahba Norveçin Tronheym şəhərində böyüyüb. Onun anası norveçli, atası isə Cənubi Azərbaycandandır.
Bölmənin digər xəbərləri
