Növbəti Karyera İnkişaf Forumu keçiriləcək
Bakı, 30 noyabr, AZƏRTAC
Əmək və Əhalinin Sosial Müdafiəsi Nazirliyinin tabeliyindəki Dövlət Məşğulluq Agentliyinin təşkilatçılığı ilə dekabrın 19-da üçüncü dəfə Azərbaycan Karyera İnkişaf Forumu keçiriləcək.
Agentliyin Strateji kommunikasiya departamentindən AZƏRTAC-a verilən məlumata görə, forum “Yenilikləri fürsətə çevir!” devizi ilə təşkil olunacaq.
Tədbirdə karyera inkişafı üzrə yerli və qlobal nailiyyətlər, müasir yanaşmalar, rəqabətli mühitdə kadr ehtiyatının formalaşdırılması üçün effektiv ali təhsil strukturunun qurulması mexanizmləri, daim dəyişən dünyada tələb olunan bacarıqlar və karyera sahəsində müasir tələb-təklif trendləri müzakirə olunacaq.
Forumda karyera məsləhətçiləri, təhsil ekspertləri, dövlət və özəl sektorun nümayəndələri, inkişaf mentorları iştirak edəcək, müxtəlif mövzularda təqdimatlar ediləcək.
Üç paneldən ibarət forumda yerli ekspertlərlə yanaşı, karyera inkişafı üzrə tanınmış beynəlxalq mütəxəssislərin də iştirakı gözlənilir.
Ölkəmizdə karyera inkişafının müzakirəsi sahəsində ən qabaqcıl təcrübələrdən sayılan Azərbaycan Karyera İnkişaf Forumunda birgə müzakirələr, sual-cavab sessiyaları və qruplar formatında görüşlər təşkil ediləcək.
Azərbaycan Karyera İnkişaf Forumuna iştirakçı qismində qatılmaq istəyən şəxslər üçün yaxın günlərdə qeydiyyata başlanılacaq.
Bölmənin digər xəbərləri
