Nqiem Vu Xay: Heydər Əliyevin 100 illik yubileyi Vyetnam xalqı üçün də əlamətdardır
Hanoy, 12 may, AZƏRTAC
Bu gün təkcə Azərbaycan xalqı üçün deyil, həm də biz vyetnamlılar üçün də əlamətdar gündür. Çünki biz böyük lider, Azərbaycanın Ümummilli Lideri Heydər Əliyevin 100 illik yubileyini qeyd edirik.
Bu fikri Vyetnam-Azərbaycan Dostluq Assosiasiyasının fəxri sədri Nqiem Vu Xay AZƏRTAC-ın xüsusi müxbirinə müsahibəsində deyib.
O bildirib: “Bu il biz həm də Heydər Əliyevin keçmiş SSRİ Nazirlər Soveti sədrinin birinci müavini qismində Vyetnama tarixi səfərinin 40-cı ildönümünü qeyd edəcəyik. Doğrudan da bu, tarixi səfər idi. Çünki Heydər Əliyevin səfəri təkcə SSRİ-Vyetnam münasibətləri baxımından deyil, həm də Azərbaycan ilə Vyetnam xalqları arasında dostluq nöqteyi-nəzərindən böyük məna daşıyırdı. Biz vyetnamlılar onun səfərini böyük minnətdarlıq hissi ilə xatırlayırıq. Səfər çox uğurlu keçdi, böyük nailiyyətlər əldə olundu. Hesab edirəm ki, Heydər Əliyevin Azərbaycan ilə Vyetnam arasında dostluğun və əməkdaşlığın möhkəmlənməsinə böyük töhfələri olub. Onun bu istiqamətdəki rolu çox nəhəngdir”.
“Biz Azərbaycan xalqına - dostlarımıza Vyetnamın çətin günlərində göstərdiyi dəstəyə, hər şeyə görə səmimi minnətdarlığımızı bildiririk”, - deyən Nqiem Vu Xay Azərbaycanda təhsil alan vyetnamlılar olaraq Bakıda gözəl vaxtlarının, gəncliklərinin keçdiyini söyləyib.
“Son illərdə mənə yenidən bir neçə dəfə Bakıya getmək nəsib oldu. Mən Azərbaycanın sürətli inkişafına çox sevindim, insanlar həyatlarından zövq alırlar. Ən əsası, siz ölkənizin torpaqlarını yenidən birləşdirdiniz. Buna görə Azərbaycan xalqını təbrik edirəm. Arzu edirəm ki, bundan sonra Azərbaycanda daim sülh olsun.
Qeyd edək ki, Nqiem Vu Xay ötən əsrin 70-ci illərində ozamankı Azərbaycan Dövlət Universitetində geologiya ixtisası üzrə ali təhsil alıb. Ölkəsinə qayıtdıqdan sonra yerli neft-qaz geologiyası sahəsində kadrların hazırlanmasında yaxından iştirak edib. 2011-2013-cü illərdə Vyetnamın elm və texnologiya nazirinin müavini vəzifəsində çalışıb, Vyetnam Elm və Texnologiyalar Assosiasiyaları Birliyinin vitse-prezidenti, Vyetnam Milli Assambleyasının deputatı olub. Prezident İlham Əliyevin 2014-cü ildə Vyetnama dövlət səfəri zamanı vaxtilə Azərbaycanda təhsil almış vyetnamlılarla görüşünün nəticəsi olaraq yaradılmış Vyetnam-Azərbaycan Dostluq Assosiasiyasının ilk sədri olub. İki ölkə arasında dostluq və əməkdaşlıq əlaqələrinin inkişafında xidmətlərinə görə Prezident İlham Əliyevin Sərəncamı ilə 2017-ci ildə “Tərəqqi” medalı ilə təltif olunub.
Şahin Cəfərov
AZƏRTAC-ın xüsusi müxbiri
Hanoy
Bölmənin digər xəbərləri
