OLİMPİADANIN TƏŞKİLATÇILARI TAMAŞAÇILARLA DOLU TRİBUNALARIN SİRRİNİ AÇMIŞLAR
AZƏRTAC xəbər verir ki, Pekin Olimpiadası təşkilatçılarının etiraf etdiklərinə görə, onlar Çin paytaxtının idman meydançalarındakı boş tamaşaçı yerlərini doldurmaq üçün çox vaxt dəstək qruplarından istifadə edirlər. Təşkilatçıların fikrincə, tamaşaçı ilə dolu tribunalar idman yarışlarında bayram əhval-ruhiyyəsi yaratmaq üçün çox zəruridir.
Çin dilində idman şüarları səsləndirən tünd sarı rəngli idman köynəyi geymiş tamaşaçıları Olimpiya yarışlarının əksəriyyətində görmək olar.
Təşkilat komitəsinin icraçı direktoru Van Veya demişdir: “İstifadə etdiyimiz dəstək qrupları könüllülərdən ibarətdir. Onlar bayram əhval-ruhiyyəsi yaradaraq, fərq qoymadan bütün idmançıları yaxşı nəticələr əldə etməyə ruhlandırırlar”.
Çin məmurunun sözlərinə görə, stadionlarda müxtəlif səbəblərdən boş qalmış yerlər idmançıları çaşdıra, həvəsdən sala bilər.
Olimpiada təşkilatçılarının açıq etirafı idman pərəstişkarlarının əksəriyyətini narazı salmışdır. Məsələ bundadır ki, Oyunların ən gərgin çağında kassalarda biletlər qalmamışdır. Onları çox baha qiymətə yalnız alverçilərdən almaq mümkündür. Hər gün yüzlərlə idman azarkeşi alverçilərə müraciət edir.
Bölmənin digər xəbərləri
