OLİMPİYA MƏŞƏLİ ALMATIYA GƏLMİŞDİR
Almatıda Olimpiya məşəli estafeti start götürmüşdür. Olimpiadanın simvolunun təntənəli surətdə ötürülməsi mərasimini Qazaxıstan Prezidenti Nursultan Nazarbayev açmışdır. O, məşəli Çin səfirindən alaraq yüksək dağ stadionu ”Medeo” boyu 200 metr qaçmış, sonra məşəli 2004-ci il Afina Olimpiadasının çempionu olmuş Qazaxıstan boksçusu Bəxtiyar Artayevə vermişdir.
Bir gün əvvəl Almatıda keçirilmiş mətbuat konfransında şəhərin meri İmanqali Tasmaqambetov bildirmişdi ki, estafet hər biri 10 kilometr olmaqla, iki mərhələdə keçiriləcəkdir. Marşrutun birinci hissəsi “Medeo” stadionundan başlanacaq, ikinci hissəsi isə bilavasitə şəhərdən keçəcəkdir. Estafet Qazaxıstan estradası ulduzlarının böyük konserti ilə Almatının mərkəzində - ölkənin keçmiş parlament binası yanında başa çatacaqdır. Təhlükəsizliyin təmin edilməsinə şəhər daxili işlər departamentinin 4,5 min əməkdaşı cəlb olunmuşdur.
Almatı küçələrində Olimpiya məşəlini 80 nəfər, o cümlədən Olimpiya çempionları, mədəniyyət xadimləri, ölkənin idman federasiyalarının prezidentləri aparacaqlar. Estafetin hər bir iştirakçısı Olimpiya məşəlini şəhərin küçələrində təxminən 200 metr aparacaqdır.
Sonuncu məşəlaparan Yermaxan İbrahimov Olimpiya məşəlini Çin nümayəndələrinə ötürəcəkdir. Çinlilər isə dərhal hava limanına yola düşərək, təyyarə ilə Türkiyəyə uçacaqlar. Sonra Olimpiya məşəli İstanbuldan Sankt-Peterburqa gətiriləcəkdir. Aprelin 5-də burada estafetin növbəti mərhələsi başlanacaqdır.
Bölmənin digər xəbərləri
