OMBUDSMAN APARATINDA UŞAQ HÜQUQLARI ÜZRƏ RESURS MƏRKƏZİ YARADILMIŞDIR
Ombudsman Elmira Süleymanova 2005-2009-cu illərdə BMT-nin Uşaq Fondunun (UNİSEF) ölkəmiz üzrə yeni proqramına və müvəkkillə bu beynəlxalq təşkilat arasında razılaşmaya əsasən, təsisatda uşaq hüquqları üzrə resurs mərkəzinin yaradıldığını bildirmişdir. Qeyd edilmişdir ki, məqsəd ölkəmizdə uşaq hüquqlarının pozulması hallarının qarşısının alınması, həmçinin pozulmuş hüquqların bərpası üzrə işlərin əlaqələndirilməsidir. Müvəkkil yeni yaradılmış mərkəzin UNİSEF-in dəstəyi ilə kompyuterləşdiriləcəyini, burada uşaq hüquqlarına dair kitabxana yaradılacağını, uşaq hüquqları ilə məşğul olan dövlət və qeyri-hökumət təşkilatları beynəlxalq təşkilatlar ilə təcrübə mübadiləsi aparılacağını diqqətə çarpdırmışdır.
Tədbirdə gənclər və idman nazirinin müavini İntiqam Babayev, Ailə, Qadın və Uşaq Problemləri üzrə Dövlət Komitəsi sədrinin müavini Sədaqət Qəhrəmanova, UNİSEF-in Azərbaycan nümayəndəliyinin əməkdaşı D.Babayeva və başqaları respublikamızda uşaq və gənclərin sosial müdafiəsi iştiqamətində görülmüş işlərdən, mövcud problemlərdən və onların həlli yollarından danışmışlar.
