ON BİR FUTBOL ASSOSİASİYASININ BAŞ KATİBLƏRİ MİNSKDƏ TOPLAŞACAQLAR
Bakı, 23 iyun (AZƏRTAC). İyunun 24-25-də Minskdə FİFA-nın himayəsi ilə Azərbaycan, Belarus, Estoniya, Gürcüstan, Ermənistan, Qazaxıstan, Latviya, Litva, Moldova, Rusiya və Ukraynanın futbol assosiasiyalarının baş katiblərinin iştirakı ilə seminar keçiriləcəkdir. Azərbaycanı həmin seminarda AFFA-nın baş katibinin müavini Elxan Əsədov təmsil edəcəkdir.
Seminarı Avropa ölkələri üçün inkişaf proqramları üzrə böyük menecer Evoy Paskyenin başçılığı ilə FİFA-nın bir qrup mütəxəssisi keçirəcəkdir. Forumda UEFA-nın idman hüququ şöbəsinin rəisi Marsel Benz də iştirak edəcəkdir.
FİFA-nın bəzi inkişaf proqramlarının, habelə bir sıra hüquqi məsələlərin nəzərdən keçirilməsi və müzakirə olunması planlaşdırılır. Xüsusən, FİFA-nın bir sıra struktur bölmələrinin fəaliyyətinin icmalları (oyunçuların statusu, intizam məsələləri, FİFA-nın üzvü olan assosiasiyaların işləri üzrə), habelə kütləvi futbolun və hakimliyin inkişafı, oyunun keyfiyyətlə idarə olunması üzrə proqramların müzakirəsi nəzərdə tutulmuşdur.
Bölmənin digər xəbərləri
